Qazaqstanda qanaınalym júıesi aýrýlarynan bolatyn ólim-jitim 16,3%-ǵa tómendedi
ASTANA. KAZINFORM – Ulttyq shuǵyl medıtsınany úılestirý ortalyǵynyń bazasynda Angels Initiative bastamasy men Qazaq ınsýltologtar lıgasy qoǵamdyq uıymynyń uıymdastyrýymen «Train the Trainer Workshop» halyqaralyq bilim berý vorkshopy ótkizildi. Bul týraly Densaýlyq saqtaý mınıstrligi jazdy.
Atalǵan is-shara Túrki memleketteri uıymy (TMU) múshe memleketteriniń arasynda jasalǵan qoldanystaǵy memorandýmnyń sheńberinde Ortalyq Azııa elderiniń arasyndaǵy yntymaqtastyqty keńeıtý maqsatynda uıymdastyrylyp, jedel ınsýlt kezinde medıtsınalyq kómek kórsetý salasynda tájirıbe almasýǵa jáne ozyq praktıkalardy engizýge arnalǵan mańyzdy alańǵa aınaldy.
Insýlt ólim-jitim men múgedektiktiń negizgi sebepteriniń biri bolyp qalyp otyrǵan jaǵdaıda, medıtsınalyq kómekti tıimdi uıymdastyrý – patsıentti ýaqtyly baǵyttaýdan bastap joǵary tehnologııalyq dıagnostıka men emdeýge deıin – erekshe mańyzǵa ıe. Qazaqstan ınsýlt qyzmetin damytýda aıtarlyqtaı ilgerileýdi kórsetip otyr. Búginde respýblıka boıynsha normatıvtik qajettilikti tolyq qamtıtyn 85 ınsýlt ortalyǵy qurylǵan, ol degenimiz – ár 250 myń halyqqa 1 ortalyqtan.
Mı qan aınalymynyń buzylystaryn erte anyqtaý maqsatynda skrınıng engizilip, ınsýlt áleýmettik máni bar aýrýlar tizbesine engizildi. Insýlttan keıin patsıentterdi dıspanserlik esepke alý merzimi 30 kúnnen 15 kúnge deıin qysqartyldy. 2025 jyldyń qorytyndysy boıynsha em qabyldaǵan patsıentterdiń sany 8,3%-ǵa – 49 myńnan 53 myńǵa deıin ósip, trombolızıs júrgizý úlesi 11%-ǵa artty, al ınsýltten bolatyn ólim-jitim 4%-ǵa tómendedi. Qazirgi ýaqytta ınsýlt qanaınalym júıesi aýrýlarynan bolatyn jalpy ólim-jitim qurylymynyń 32%-yn quraıdy. Qabyldanǵan sharalardyń nátıjesinde 2026 jyldyń alǵashqy eki aıynda qanaınalym júıesi aýrýlarynan jalpy ólim-jitim 16,3%-ǵa tómendedi.
Іs-shara baǵdarlamasyna ınteraktıvti master-klastar, klınıkalyq jaǵdaılardy modeldeý jáne sheshim qabyldaý boıynsha praktıkalyq sessııalar engizildi. Mundaı format kásibı bilimdi tereńdetip qana qoımaı, jedel medıtsınalyq kómek kórsetý kezinde asa mańyzdy bolyp tabylatyn tıimdi komandalyq ózara is-qımyldy damytýǵa yqpal etedi.
Vorkshopqa Ázerbaıjan, Qazaqstan, Qyrǵyzstan, Mońǵolııa, Tájikstan, Túrikmenstan jáne Ózbekstan elderinen medıtsına mamandary qatysty. Insýltolog dárigerlerin, densaýlyq saqtaý uıymdastyrýshylary men jedel medıtsınalyq kómek qyzmetteriniń ókilderin qosqanda ár elden 8 qatysýshydan qatysty.
Eske salsaq, buǵan deıin bıyl elimizdegi oblystyq aýrýhanalarda 22 beıindi bólimshe ashylǵanyn jazǵan edik.
