Qazaqstanda kanaldardy mehanıkalyq tazalaý kólemi úsh esege artty
ASTANA. KAZINFORM — Qazaqstanda Sý resýrstary jáne ırrıgatsııa mınıstrligi qurylǵannan beri sýarý kanaldaryn mehanıkalyq tazalaý qarqyny úsh eseden astam artty. Bul týraly vedomstvonyń baspasóz qyzmeti málim etti.
Máselen, 2023 jyly «Qazsýshar» RMK fılıaldary 562 shaqyrym kanal tazalasa, 2024 jyly — 1148 shaqyrym, 2025 jyly — 1840 shaqyrym kanal tazartyldy. Bıyl jyl basynan beri 700 shaqyrym kanal mehanıkalyq tásilmen tazartyldy. Jyl sońyna deıin 2211 shaqyrym kanal tazalaý josparlanyp otyr. Bul sharalar kanaldardyń sý ótkizý qýatyn arttyryp, sýarmaly jerlerge sý jetkizýdi jaqsartýǵa baǵyttalǵan.
— «Qazsýshar» RMK tehnıka parkin aýqymdy jańartý kanaldardy tazalaý qarqynyn jedeldetýge múmkindik berdi. Búginde kásiporyn teńgeriminde 2100-den astam arnaıy tehnıka bar. Byltyr Ónerkásipti damytý qorynyń qarajaty esebinen 576 tehnıka satyp alyndy. Al tarıftik qarajat esebinen 135 tehnıka alyndy. Bıyl bul baǵyttaǵy jumys jalǵasyp jatyr, — dedi «Qazsýshar» RMK bas dırektorynyń mindetin atqarýshy Anýar Óskenbaev.
Aıta keteıik, buǵan deıin Jambyl oblysynda 9,2 shaqyrym «Ismaıl» kanaly jańǵyrtylyp jatqanyn jazdyq.
