Qazaqstanda kanadalyq modelderdi qoldaý máseleleri talqylandy
ASTANA. QazAqparat - Búgin QR Tuńǵysh Prezıdenti - Elbasy kitaphanasynda «Qazaqstanda kanadalyq modelderdi qoldaný» taqyrybynda konferentsııa ótti.
Onda elimizdegi memlekettik basqarýdyń, ekonomıka jáne áleýmettik damýdyń kanadalyq úlgirlerin qoldaný máseleleri talqylandy.
«Jer shalǵaılyǵyna qaramastan Qazaqstan men Kanadamen aradaǵy baılanystar óte joǵary deńgeıde damý ústinde. Máselen, osy ýaqytqa deıingi eki eldiń arasyndaǵy saýda-sattyq kólemi 6 mlrd. dollarǵa jýyqtaǵan. Sońǵy ýaqytta bul baılanystardyń tómendegeni baıqalady. Árıne, ol eń birinshi kezekte munaı óndirý kóleminiń kemýine tikeleı baılanysty. Degenmen, elderimiz arasynda aýyl sharýashylyǵy jáne ózge salalardaǵy baılanystar qarqyn alýda», - dedi sharaǵa qatysqan Kanadanyń Qazaqstandaǵy Tótenshe jáne Ókiletti Elshisi Shon Perrı Staıl.
Sonymen qatar Elshi búgingi konferentsııa taqyrybyna da toqtala kele, Kanadanyń memlekettik basqarý isindegi kóptegen úlgileri qazaq elinde de qoldanylyp jatqanyn atap ótti.
Konferentsııa qatysýshylarynyń aıtýynsha, Qazaqstan men Kanadanyń geografııa, aýa raıy, tabıǵı qorlar sııaqty ortaq uqsastyqtary bar. Al bul jaıt eki eldiń arasyndaǵy taý-ken ónerkásibinde, energetıka, aýyl sharýashylyǵy, bilim berý salalarynda baılanys kópirin nyǵaıtýǵa jol ashady.
