Qazaqstanda kanadalyq orman bızondary kóbeıip jatyr

ASTANA. KAZINFORM — Birneshe kún buryn jelide jaıylyp júrgen bızondardyń vıdeosy taraǵan edi. Bul kadrlar «Buırataý» ulttyq parkinde túsirilgen eken.

Shetelden alyp kelgen bızondar jergilikti jaǵdaıǵa tez beıimdelip, 2023 jyly alǵash ret tóldedi.

— Bızondar 2020 jyly bizdiń ulttyq parkke ákelingen edi. Qazir olardyń sany 26-ǵa jetti. Qazir olar 400 gektar aýmaqta kútilip, baptalyp jatyr. Bızondardy jalpy týrızmdi damytý maqsatynda alyp kelgen bolatynbyz. Jergilikti turǵyndar men týrıster týrıstik marshrýt arqyly bızondardy kórýge múmkindik alady, — deıdi «Buırataý» ulttyq parkiniń Tabıǵat keshenderin qorǵaý bóliminiń bastyǵy Qaharman Havdalmurat «Búgin LIVE» baǵdarlamasyna bergen onlaın suhbatynda.

Mamandar bızondardyń sanyn keler jyly 30-dan asyrýdy josparlap otyr.

— Bul sıyrtuqymdas bolǵandyqtan, Qazaqstannyń aýa raıyna tózimdi. Bul janýar «kanadalyq orman bızony» dep atalady. Bizdiń Ortalyq Qazaqstanǵa jersinip, jyldam beıimdelip ketti. Eshqandaı másele týyndaǵan joq. Bızondar jylyna 1 buzaýdan tóldeıdi. Kelesi jyly taǵy 10 shaqtysy qosylyp, 30 bastan asyp, 40-qa jýyqtaýy múmkin, — deıdi spıker.

Aıta keteıik, «Ertis ormanynda» jabaıy janýarlarǵa qysqy azyq oryndary daıyndalyp jatyr.