Qazaqstanda qan tapsyrýshylardyń 10 paıyzy «kadrlyq donorlar» bolyp tabylady
ASTANA. QazAqparat - Qazaqstanda qan tapsyrýshylardyń 90 paıyzy qandy óteýsiz, ıaǵnı aqysyz tapsyrady. Bul týraly búgin Ortalyq kommýnıkatsııalar qyzmetindegi brıfıngte Transfýzıologııa ǵylymı-óndiris ortalyǵynyń dırektory Jandos Búrkitbaev málim etti.
«Búginde bizdiń donorlardyń negizgi úlesi óteýsiz bolyp tabylady. DDSU-nyń usynystaryna sáıkes, donorlyqtyqty uıymdastyrý talaptarynyń biri - ony aqysyz túrde júzege asyrý. Qazirgi kezde Qazaqstanda donorlardyń 90 paıyzy qandy aqysyz tapsyrady. Al 10 paıyzyn «kadrlyq donorlar» dep atasa bolady. Osyǵan baılanysty qannyń keıbir komponentterine óndiristik qajettiliktiń bolýyna oraı, biz keı mezgilde qan tapsyrý úshin donorlardy tartýǵa májbúrmiz. Qazaqstanda donorlyq aqyly bolatyndaı ýájdeme bizde joq», - dep toqtaldy ortalyq dırektory.
Onyń aıtýynsha, qazirgi kezde donorlyqty uıymdastyrýdyń ulttyq salalyq baǵdarlamasynyń jobasy ázirlendi. «Biz úshinshi jyl qatarynan DDSU-men birge aýqymdy jumystardy atqarýdamyz. Osy baǵytta úlken áleýmettik saýalnama júrigizip, taldaý jasaldy. Búginde Donorlyqty uıymdastyrý boıynsha ulttyq salalyq baǵdarlamanyń jobasy ázirlendi. Jyl sońyna deıin ony Densaýlyq jáne áleýmettik damý mınıstrliginiń qaraýyna usynamyz. Osy oraıda mınıstrlik ony qabyldaý úshin Úkimettiń qaraýyna usynady dep úmittenemin», - dedi J. Búrkitbaev.
