Qazaqstanda qan donorlyǵyn damytý jospary pysyqtalyp jatyr – Oljas Bektenov
ASTANA. KAZINFORM – Densaýlyq saqtaý mınıstrligi 2028 jylǵa deıin qan donorlyǵyn damytý jónindegi is-sharalar josparyn ázirlep jatyr. Bul týraly Premer-Mınıstr Oljas Bektenov depýtattyq saýalǵa bergen jaýabynda málimdedi.
Onyń aıtýynsha, jospar medıtsınalyq qyzmetter tizbesin keńeıtýdi, onyń ishinde gemopoetıkalyq diń jasýshalaryn transplantatsııalaýdy eskere otyryp, memlekettik saıasatty jetildirýdi kózdeıdi.
– Qan komponentterin sapaly ári qaýipsiz qoldanýdy qamtamasyz etý úshin donorlyq qanǵa eki kezeńdi skrınıng engizildi. Sonymen qatar onyń komponentterin óńdeýdiń zamanaýı ádisteri qoldanylady, oǵan qosa ınfektsııalyq jáne ımmýnologııalyq qaýipsizdikke baqylaý kúsheıtildi, – delingen qujatta.
Budan bólek, Úkimet basshysy elimizde búgingi kúni qaýipsizdik pen sapanyń zamanaýı talaptaryna sáıkes keletin qan qyzmetiniń ortalyqtandyrylǵan jáne standarttalǵan modeli qalyptasqanyn atap ótti.
– Qazirgi ýaqytta respýblıka boıynsha qan qyzmetiniń 19 uıymy jumys isteıdi. Onyń ishinde 2 respýblıkalyq, 15 oblystyq jáne 2 qalalyq uıym bar, – dep tolyqtyrdy Oljas Bektenov.
Aıta keteıik, aqpan aıynda 18 myńǵa jýyq qazaqstandyq qan donory boldy.
Sonymen qatar SQO-lyq donor úsh patsıenttiń ómirin saqtap qaldy.
Sondaı-aq elimizde donorlyqqa kelisimin bergenderdiń sany 3 esege jýyq ósti.
