Qazaqstanda qalyptasqan polıetnıkalyq qoǵamda etnıkalyq BAQ róli asa mańyzdy - R. Kım

ASTANA. 15 qarasha. QazAqparat - Qazaqstanda qalyptasqan polıetnıkalyq qoǵamda etnıkalyq BAQ róli asa mańyzdy. Bul týraly búgin Astanada Qazaqstan halqy Assambleıasynyń «Tózimdilik jáne BAQ» atty halyqaralyq medıaforýmynda sóz sóılegen Májilis depýtaty, Qazaqstan koreıleri qaýymdastyǵynyń tóraǵasy Roman Kım málim etti.

«Qazaqstan halqy Assambleıasy óziniń 18 jyldyq tarıhynda bizdiń elimizdiń qoǵamdyq-saıası, áleýmettik jáne mádenı ómiriniń eń belsendi qatysýshy ınstıtýtyna aınaldy. Onyń jumysynyń asa mańyzdy qyrlarynyń biri - memleketimizdegi ultaralyq saıasatty durys ári tereń kórsetý, jurtshylyqpen osy baǵyttaǵy jumysty jandandyrý, etnomádenı baǵyttaǵy medıakeńistikke belsendi aralasý bolyp tabylady. Bul baǵytta etnıkalyq buqaralyq aqparat quraldary da basty ról atqarady», - deıdi R. Kım.

Onyń aıtýynsha, búgingi tańda Qazaqstanda memleket júzege asyryp otyrǵan tıimdi ulttyq saıasattyń nátıjesinde 37 respýblıkalyq jáne óńirlik deńgeıdegi etnıkalyq-BAQ qyzmet etip keledi. «Qazaqstan qalyptastyrǵan polıetnıkalyq qoǵamda bulardyń rólin baǵalamaýǵa bolmaıdy. Ulttyq BAQ tek qana ishkietnıkalyq qundylyqtar rólin atqaryp qana qoımaı, osy baǵyttaǵy aqparattyq keńistiktiń tolyqqandy qatysýshylary bolyp tabylady. Sondyqtan da, olar zamanaýı medıanaryqtyń barlyq talaptaryna saı bolyp, básekelestikke berik bolýy shart», - dedi depýtat.