Qazaqstanda qalqansha beziniń qaterli isigin qaýipsiz emdeýdiń jańa tásili engizildi
NUR-SULTAN. QazAqparat - Elimizde qalqansha beziniń qaterli isigin qaýipsiz ári tıimdi joly engizildi dep habarlaıdy QazAqparat QR Densaýlyq saqtaý mınıstrligine silteme jasap.
Semeı qalasynyń ıadrolyq medıtsına jáne onkologııa ortalyǵynda qalqansha beziniń qaterli isigin emdeýdiń biregeı, tıimdi jáne qaýipsiz ádisi engizildi.
Qazaqstanda atalǵan emdeý ádisi alǵash qolǵa alynyp otyr. Óz kezeginde sarapshylar qazaqstandyqtar endigi ýaqytta shetelge barmaı, elde emdelý múmkindigi týǵanyn alǵa tartty.
Odan bólek, mamandardyń málimdeýinshe, jańa tehnologııa memleket qarjysyn únemdep, ony medıtsınanyń basqa da baǵyttaryna jumsaýǵa múmkindik beredi.
Habarlamada aıtylǵandaı, jańa ádistiń biregeıligi natrıı ıodıdi I-131 shyǵaratyn beta bólshekter tinderge tek 2 mm ǵana áser etedi. Radıatsııanyń bul túri basqa organdarǵa qaýipti emes. Radıoaktıvti ıodtyń tek qalqansha beziniń jasýshalaryna áser etýi radıoıodterapııanyń negizin quraıdy jáne onyń erekshe tıimdiligin anyqtaıdy.
«ShQO qaterli isiktermen syrqattanýshylar sany boıynsha aldyńǵy oryndardaǵy aımaq. 18 myńnan astam patsıent esepte tur. Qazaqstanda jyl saıyn qalqansha beziniń qaterli isigimen aýyratyn 600-ge jýyq naýqas radıoıodterapııa júrgizýdi qajet etedi. Mundaı ortalyqtyń ashylýy elimizdiń barlyq onkologııalyq qyzmeti úshin óte mańyzdy oqıǵa. Bizde radıoıodterapııa ádisi alǵash ret qoldanylady, emdeý Halyqaralyq hattama boıynsha júrgiziledi», - dedi «Qazaq onkologııa jáne radıologııa» AQ basqarma tóraǵasy Densaýlyq saqtaý mınıstrliginiń bas onkology Dılıara Qaıdarova.
Aımaq basshysy Danıal Ahmetov osydan 4 jyl buryn ShQO-da densaýlyq saqtaý salasyn damytý baǵdarlamasyn qabyldanǵanyn aıtty. Osy ýaqyt aralyǵynda barlyq medıtsınalyq jabdyqtarǵa aýdıt júrgizilgen.
Sonymen qatar, «Ana men bala», «Onkologııa», «Kardıologııa» jáne «Travmotologııa» baǵyttary boıynsha medıtsınalyq tehnıkamen jabdyqtaýdy ortasha halyqaralyq deńgeıge shyǵarý mindeti qoıylǵan.
