Qazaqstanda qalǵysy keletin sheteldikter úshin beıimdeý ortalyqtary ashyla ma

ASTANA. QazAqparat – QR Premer-Mınıstri Álıhan Smaıylov Májilis depýtattarynyń Qazaqstanda qalǵysy keletin azamattar úshin beıimdeý ortalyqtaryn ashýǵa qatysty saýalyna jaýap berdi, dep habarlaıdy QazAqparat tilshisi.

«Elimizde memlekettik tildi, qazaq halqynyń dástúri men mádenıetin úırengisi keletinder úshin 40 Dostyq úıinde jumys isteıtin 174 jeksenbilik mektepte memlekettik tildi tegin úırenýge jaǵdaı jasalǵan, onda memlekettik tildi úırenýmen qatar, qazaq mádenıeti men ádet-ǵurpymen tanystyrý issharalary ótkiziledi. Mıgranttar memlekettik tildi ákimdikter janyndaǵy «Til» oqý-ádistemelik ortalyqtarynyń bazasynda da úırene alady. «Halyqtyń kóshi-qony týraly» zańda kóship kelýshilerge, qandastarǵa beıimdeý jáne ıntegratsııalaý ortalyqtarynda aqyly beıimdeý jáne ıntegratsııalyq qyzmetter alý quqyǵyn beretin norma qarastyrylǵan», - dep atap ótedi Úkimet basshysy.

Májilis depýtattarynyń saýalynda kelýshilerdiń Qazaqstanda qalýǵa nıet bildirgen azamattary úshin qalalar men eldi mekenderde beıimdeý ortalyqtaryn ashý usynylǵan. Depýtattardyń paıymynsha, bul ortalyqtarda olarǵa Qazaqstan tarıhymen, mádenıeti men turmys-saltymen, salt-dástúri men ádet-ǵurpymen tanystyrý qajet.

Qazaqstan Respýblıkasynyń Konstıtýtsııasy men zańdaryn túsindirip, quqyqtyq keńes berý kerek.

Sonymen qatar qazaq tili kýrstaryn ashyp, árbir kóship kelgen shetel azamatyn beıimdeý ortalyǵynan ótýdi mindettegen jón.