Qazaqstanda qaldyqtardy qaıta óńdeý jospary merziminen buryn oryndalady

ASTANA. QazAqparat - Qaldyqtardy qaıta óńdeý deńgeıin arttyrý boıynsha jospar merziminen buryn oryndalýy múmkin. Bul týraly Parlament Senatynda «Jasyl ekonomıka» taqyrybynda ótip jatqan Úkimet saǵatynda QR Energetıka vıtse-mınıstri Sábıt Nurlybaı málim etti, dep habarlaıdy QazAqparat.

«Qaldyqtardy basqarý taqyrybyna toqtalsaq, elimizde «Jasyl ekonomıkaǵa» kóshý jóninde tujyrymdamada 2030 jylǵa qaraı qaldyqtardy qaıta óńdeý úlesin 40 paıyzǵa, al 2050 jylǵa deıin 50 paıyzǵa jetkizý kózdelgen. Jyl saıyn elimizde 5-6 mln tonna turmystyq qatty qaldyqtar túziledi. Bıylǵy 8 aıda Qazaqstanda 3,2 mln tonna turmystyq qatty qaldyqtar jınaldy. Onyń ishinde 330 myń tonnaǵa jýyǵy qaıta óńdeldi. Bul kórsetkish jalpy kólemnen 10,8 paıyz shamasynda», - dedi S. Nurlybaı.

Osy oraıda ol atalǵan kórsetkish 2017 jyly 9 paıyz deńgeıinde bolsa, 2016 jyly 2,6 paıyzdy qamtyǵanyn eske salyp ótti. Qazirgi kezde elimizde qaldyqtardy suryptap, qaıta óńdeıtin 130-dan astam kásiporyn bar jáne olar jıyrmadan astam ónim túrlerin shyǵarady.

«Ákimdikter bizdiń mınıstrlikpen birge shaǵyn jáne orta bıznesti keńinen tarta otyryp, turmystyq qatty qaldyqtardy zamanaýı kádege jaratý ári qaıta óńdeý jónindegi sharalar keshenin bekitti. Tıisti mınıstrliktermen, qaýymdastyqtarmen, «Atameken» UKP-men birlese bul taqyrypty birneshe ret talqylap, usynystardy ákimdikterge jiberdik. Osy baǵyttaǵy jumystar laıyqty túrde atqarylsa, 2030 jylǵa qaraı qaldyqtardy qaıta óńdeýdi 40 paıyzǵa jetkizý kórsetkishin merziminen buryn iske asyra alamyz, ıaǵnı 2-3 jylda oryndaýǵa bolady», - dedi vıtse-mınıstr.