Elimizde qaldyqtardy jınaý men óńdeýge 185 mlrd teńge bólinedi
ASTANA. KAZINFORM – «Jasyl damý» AQ «Ónerkásipti damytý qory» AQ arqyly qaldyqtardy basqarý salasyndaǵy jobalardy jeńildikpen qarjylandyrý mehanızmin júrgizýde. Bul baǵdarlama qoqys tasıtyn kólikterdi, suryptaý jelilerin jáne qaıta óńdeý zaýyttaryn satyp alýǵa múmkindik berip, qaldyqtardyń azaıýyna jáne qaıta óńdeý salasynyń damýyna yqpal etedi.
185 mıllıard teńge kólemindegi qarajat 3 jyldan 15 jylǵa deıingi merzimge 3% jyldyq syıaqy mólsherlemesimen beriledi.
«Ózderińiz biletindeı, Úkimet qaýlysymen biz qaldyqtardy jınaýǵa, tasymaldaýǵa jáne qaıta óńdeýge suryptap jınaý boıynsha ınfraqurylymdy damytýǵa shamamen 185 mlrd teńge bólemiz. Búgingi tańda shamamen 232 mlrd teńgege 94 jobadan turatyn pýl quryldy. Bul jumys 2 kezeńge bólinedi. Ónerkásipti damytý qory arqyly birinshi kezeńge shamamen 125 201 mln teńgege 30 kompanııa ótti, olar qarjylandyrý úshin óz qujattaryn jınap jatyr. Onyń ishinde 79 929 mln teńgege 14 óńdeý kásiporny, 49 109 mln teńgege – 10 qoqys suryptaý kesheni jáne 1 163 mln teńgege – 21 arnaıy tehnıka satyp alý boıynsha 6 kásiporyn bar», - dedi «Jasyl damý» AQ Basqarma tóraǵasynyń orynbasary Nurjan Qabdoldanov.
Olardyń qatarynda jalpy somasy 104 mlrd teńgege zaýyt qurylysy, elektr qýatyn óndiretin, qatty turmystyq qaldyqtardy qaıta óńdeý tehno-ekoparki (Almaty oblysy), qaǵaz jáne karton óndirý zaýytynyń qurylysy (Almaty q.), shynyny kádege jaratý jáne qaıta óńdeý jelisi bar shyny ydystardy shyǵarý zaýytynyń qurylysy (Qyzylorda q.) jobalary bar.
«Biz bul jobalardy tolyqqandy júzege asyramyz dep úmittenemiz», - dep tolyqtyrdy Nurjan Qabdoldanov.
