Qazaqstanda qaldyqtardy óńdeýge 113,6 mlrd teńge bólindi
ASTANA. KAZINFORM – Qazaqstanda turmystyq qaldyqtardy óńdeý jáne suryptaý ınfraqurylymyn damytý maqsatynda sońǵy eki jylda birqatar joba iske asyrylyp jatyr. Búginde jeńildetilgen qarjylandyrý tetigi aıasynda 28 jobaǵa 113,6 mlrd teńge bólindi. Bul týraly QR Ekologııa jáne tabıǵı resýrstar mınıstrligine qarasty Qaldyqtardy basqarý departamentiniń dırektory Rýslan Túkenov málimdedi.
Mınıstrlik dereginshe, Qazaqstanda jyl saıyn shamamen 4,5 mln tonna kommýnaldyq qaldyq túziledi. Onyń shamamen 30%-y suryptalyp, qaıta óńdeledi.
Memleket basshysynyń tapsyrmasymen 2024 jyldan bastap ýtılızatsııalyq tólemder esebinen qaldyqtardy basqarý jobalaryn jeńildetilgen qarjylandyrý mehanızmi iske qosyldy. Baǵdarlama aıasynda kásiporyndar qoqys tasıtyn kólik, suryptaý jelileri men qaıta óńdeý óndiristerin satyp alý úshin 15 jylǵa 3 paıyzdyq mólsherlememen nesıe ala alady.
Mınıstrlik janyndaǵy Investıtsııalyq shtab 2024-2026 jyldary jalpy quny 302,3 mlrd teńge bolatyn 61 jobany maquldaǵan.
Al 2026 jylǵy 2 maýsymdaǵy jaǵdaı boıynsha «Jasyl damý» AQ 28 jobany 113,6 mlrd teńgege qarjylandyrdy. Onyń ishinde 98,9 mlrd teńge ıgerilgen.
– Qazirgi ýaqytta 11 joba paıdalanýǵa berilgen. Sonymen qatar bıyl taǵy 11 jobany iske qosý josparlanyp otyr. Al birqatar kásiporyndarda qurylys jumystary 2027-2028 jyldarǵa deıin jalǵasady, – dedi Rýslan Túkenov Ortalyq kommýnıkatsııalar qyzmetinde ótken baspasóz máslıhatynda.
Mınıstrlik bul jumystardyń nátıjesinde 2030 jylǵa qaraı qaldyqtardy qaıta óńdeý úlesin 40 paıyzǵa jetkizý kózdelip otyrǵanyn atap ótti.
Aıta keteıik, buǵan deıin, memlekettik keńesshi Erlan Qarın eki jyl ishinde «Taza Qazaqstan» jobasy aıasyndaǵy nátıjelerge toqtalǵan bolatyn.
