Qazaqstanda qaldyqtardy qaıta óńdeý tabysty salaǵa aınalýy kerek – sarapshy
ASTANA. KAZINFORM – Qaldyqtardy basqarý salasynda syzyqtyq modelden aınalmaly (tsırkýlıarlyq) ekonomıkaǵa kóshý bıznes úshin jańa múmkindikter ashyp, qaıta óńdeý kóleminiń artýyna yqpal etedi. Bul týraly BIZDIÑ ORTA podkastynda «Jasyl Damý» AQ basqarýshy dırektory Danııar Baıǵaraev málimdedi.
Onyń aıtýynsha, dástúrli júıe qaldyqtardy tek másele retinde qarastyrsa, zamanaýı tásil olardy resýrs retinde baǵalaıdy.
– Syzyqtyq qaldyqtardy basqarý júıesi – bul qaldyq árqashan problema retinde qabyldanatyn paradıgma: ony óndirip alyp, ári qaraı ne isteý kerektigi belgisiz bolady. Al tsırkýlıarlyq ekonomıka – bul múlde basqa kózqaras, munda qaldyqtar shıkizat ári qosymsha tabys kózi retinde qarastyrylady, – dedi Danııar Baıǵaraev.
Ol Ekologııa mınıstrligi ázirlegen qaldyqtardyń barlyq túrin basqarý jónindegi tujyrymdamanyń qabyldanýy mańyzdy qadam bolǵanyn atap ótti.
– Qazaqstan Táýelsizdik alǵan 35 jyl ishinde alǵash ret qaldyqtardyń barlyq túrin basqarý jónindegi tujyrymdama qabyldandy. Ony ázirleýge shamamen 120 sarapshy – otandyq jáne halyqaralyq mamandar qatysty. Bul saladaǵy barlyq protsesti júıelegen alǵashqy keshendi baǵdarlamalyq qujat, – dedi ol.
Atalǵan qujat aıasynda ashyq erejeler qalyptastyrý jáne bıznesti yntalandyrýǵa baǵyttalǵan zańnamalyq bastamalar iske asyrylyp jatyr.
– Biz basqarý qaǵıdalary men yntalandyrý sharalaryn ázirlep jatyrmyz. Qosymsha retteý tetikteri engizilgen saıyn bul jaqsy, sebebi biz haostan júıeli basqarýǵa ótemiz, – dep túsindirdi «Jasyl Damý» AQ ókili.
Sondaı-aq ol kásipkerlerdi qaldyqtardy qaıta óńdeý protsesine tartýǵa erekshe kóńil bólinip otyrǵanyn aıtty.
– Biz barlyq qaldyq túrin esepke alyp, ınfraqurylymdaǵy tapshylyqty anyqtap, naqty sheshimder usynýymyz kerek. Qazir iri jobalar portfeli qalyptasyp jatyr. Eń bastysy – osy qaldyqtardy bızneske usyný, – dedi ol.
Sarapshynyń pikirinshe, kásipkerlerdiń ekonomıkalyq qyzyǵýshylyǵy negizgi qozǵaýshy kúsh.
– Biz barlyq qaldyqty esepke alyp, ınfraqurylymdaǵy tapshylyqty anyqtap, naqty sheshimder usynýymyz kerek. Qazir iri jobalar portfeli qalyptasyp jatyr. Eń bastysy – osy qaldyqtardy bızneske usyný, – dedi ol.
Onyń aıtýynsha, qaıta óńdeý kóleminiń artýy ekologııalyq jaǵdaıǵa tikeleı áser etedi.
– Qaıta óńdeý kóbeıgen saıyn polıgondarǵa túsetin qaldyq azaıady, demek biz ekologııaǵa naqty kómektesemiz, – dep túıindedi ol.
Sarapshylardyń pikirinshe, tsırkýlıarlyq ekonomıkanyń damýy Qazaqstanǵa tek ekologııalyq júktemeni azaıtýǵa ǵana emes, sonymen qatar bıznestiń jańa ósý núktelerin qalyptastyrýǵa múmkindik beredi.
Aıta keteıik, Astanada qaldyqtardy energııaǵa aınaldyratyn ekopark jobasy iske qosyldy.
