Qazaqstanda qaldyqtardy qaıta óńdeý deńgeıi 2030 jylǵa qaraı 40%-ǵa jetedi
ASTANA. KAZINFORM — Qazaqstanda 2030 jylǵa qaraı kommýnaldyq qaldyqtardy qaıta óńdeý deńgeıin 40 paıyzǵa deıin jetkizý josparlanyp otyr. Bul týraly Qaldyqtardy basqarý departamentiniń dırektory Rýslan Túkenov Astanada ótip jatqan «Jasyl energııa jáne qaldyqtardy qaıta óńdeý» (GEWR’26) X Eýrazııalyq bıznes-forýmynda málimdedi.
Onyń aıtýynsha, 2013 jyly elimizde kommýnaldyq qaldyqtardyń nebári 1 paıyzy ǵana qaıta óńdelse, 2025 jyldyń qorytyndysynda bul kórsetkish 30 paıyzǵa jetken.
— Júıeli jumystardyń nátıjesinde 2030 jylǵa qaraı kommýnaldyq qaldyqtardy qaıta óńdeý deńgeıin 40 paıyzǵa deıin jetkizý kózdelip otyr, — dedi Rýslan Túkenov.
Onyń málimetinshe, búginde elimizdiń 123 qalasy men aýdanynda qaldyqtardy bólek jınaý júıesi engizilgen. Al 87 eldimekende qaldyqtar suryptalady.
Rýslan Túkenovtiń aıtýynsha, 2026–2030 jyldarǵa arnalǵan qaldyqtardyń barlyq túrin basqarý tujyrymdamasy bekitildi. Qujatta salany damytýdyń jańa tásilderi aıqyndalyp, zańnamany jetildirý, ınfraqurylymdy damytý, ınvestıtsııa tartý jáne aınalym ekonomıkasy qaǵıdattaryn engizý kózdelgen.
Sondaı-aq tujyrymdama aıasynda Qaldyqtardy basqarý ulttyq ortalyǵy quryldy. Budan bólek, qaldyqtardy túgendeý, memlekettik kadastrdy jańartý jáne salany tsıfrlandyrý jumystary bastaldy.
Aıta keteıik, buǵan deıin elimizde qaldyqtardy óńdeý salasynda jalpy quny 316,9 mlrd teńgeni quraıtyn 67 joba maquldanǵanyn habarlaǵan edi.
