Qazaqstanda qaldyqtardy basqarý júıesi túbegeıli jańǵyrtylady – sarapshy
ASTANA. KAZINFORM – Qazaqstanda qaldyqtardy basqarý júıesin aýqymdy reformalaý bastaldy. Ol barlyq qaldyq túrlerin retteýdiń biryńǵaı erejelerin qalyptastyrýdy jáne jańa naryq pen jumys oryndaryn quratyn tolyqqandy salany damytýdy kózdeıdi. Bul týraly BIZDIÑ ORTA podkastynda «Jasyl Damý» AQ basqarýshy dırektory Danııar Baıǵaraev málimdedi.
Onyń aıtýynsha, qazirgi retteý júıesi qaldyqtardyń barlyq túrin qamtymaıdy. Bul basqarý isinde júıelik olqylyqtarǵa ákelip otyr.
– Búginde kommýnaldyq qaldyqtardy basqarý qaǵıdalarynan basqa naqty salalyq erejeler joq deýge bolady. Al jalpy shamamen 20 túrli qaldyq bar. Onyń ishinde kúndelikti kezdesetin 9 túri bar – qurylys jáne medıtsınalyq qaldyqtardy qosa alǵanda. Budan bólek, shamamen 60-qa jýyq qosalqy túri bar. Biraq olardyń barlyǵy tek kommýnaldyq qaldyqtardy basqarý qaǵıdalary aıasynda ǵana rettelip otyr, – dedi Danııar Baıǵaraev.
Ol negizgi ózgeris keshendi ári biryńǵaı retteý júıesine kóshý bolatynyn atap ótti.
– Bul reforma aıasynda ártúrli qaldyq túrlerin basqarýdyń biryńǵaı erejelerin qalyptastyramyz. Keıbir baǵyttarda naqty qaldyq túrlerine jeke retteý engiziledi, al keı jaǵdaıda ortaq erejelermen biriktiriledi. Eń bastysy – barlyq qaldyq túzýshilerge, naryq qatysýshylaryna jáne memlekettik organdarǵa ortaq talaptar paıda bolady, – dep túsindirdi ol.
Reformada salanyń ekonomıkalyq áleýetine jáne qaldyqtar naryǵyn qalyptastyrýǵa erekshe mán berilip otyr.
– Reformanyń negizgi maqsaty – tabys ákeletin, jumys oryndaryn ashatyn jáne qaldyqtar naryǵyn qalyptastyratyn jańa salany qurý. Іs júzinde mundaı naryq Qazaqstanda alǵash ret qalyptasqaly otyr, – dedi «Jasyl Damý» ókili.
Sonymen qatar reformany iske asyrý ekologııalyq retteýdiń tıimdiligin arttyryp qana qoımaı, eldegi «jasyl» ekonomıkany damytýdaǵy mańyzdy qadamǵa aınalady.
Buǵan deıin elimizde qaldyqtardy óńdeý ortalyǵy qurylatynyn jazǵanbyz.
