Qazaqstanda qaldyq shıkizattan avıatsııalyq otyn óndirilýi múmkin
ASTANA. KAZINFORM – Qazaqstanda turaqty avıatsııalyq otyn óndirý tehnologııalaryn engizý josparlanyp otyr. Bul týraly Italııa-Qazaqstan jetkizý tizbekteri forýmynda Italııandyq-Qazaq saýda qaýymdastyǵynyń vıtse-prezıdenti Oljas Shyntaev málimdedi.
Onyń aıtýynsha, qazirgi tańda energetıka salasynda jańa kezeńge ótý úshin zamanaýı tehnologııalar qajet.
– Bizdiń negizgi baǵytymyz – tehnologııalar transferti. ıAǵnı, eýropalyq tehnologııalardy Qazaqstan jaǵdaıyna beıimdep, kezeń-kezeńimen engizýdi josparlap otyrmyz. Bul bir kúnde júzege asatyn jumys emes, ol úshin keshendi zertteýler júrgizilýi tıis, - dedi ol.
Spıkerdiń sózinshe, atalǵan jumystardyń nátıjesinde elimizde joǵary tehnologııalyq lokalızatsııany damytýǵa, ıaǵnı jergilikti óndiristi jolǵa qoıýǵa múmkindik týady.
Oljas Shyntaevtyń aıtýynsha, negizgi baǵyt – turaqty avıatsııalyq otyn óndirý.
– Áńgime turaqty avıatsııalyq janarmaı týraly bolyp otyr. Bul – dástúrli munaı ónimderinen óndirilmeıtin, qorshaǵan ortaǵa áseri tómen otyn túri. Mysaly, bizde bıdaıdan spırt óndiriledi, al teorııa júzinde spırtten avıatsııalyq otyn jasaýǵa bolady. Alaıda ol azyq-túlik resýrstaryn paıdalanatyndyqtan, tolyqqandy turaqty sheshim retinde qarastyrylmaıdy, - dedi ol.
Onyń aıtýynsha, neǵurlym tıimdi baǵyt – paıdalanylǵan maılar men qaldyq shıkizatty qaıta óńdeý arqyly avıatsııalyq otyn óndirý.
– Turaqty otyn óndirisi úshin azyq-túlikke jatpaıtyn shıkizatty, sonyń ishinde qoldanylǵan maı ónimderin qaıta óńdeý mańyzdy. Osy baǵyt biz úshin anaǵurlym perspektıvaly, - dedi qaýymdastyq ókili.
Sondaı-aq ol adam kapıtalynyń róline de toqtaldy.
– Qazir Italııada 2300-ge jýyq qazaqstandyq stýdent tegin bilim alyp jatyr. Olar – bizdiń bolashaqtaǵy negizgi kópirimiz. Sol jaqta bilim alyp, tehnologııalardy meńgerip, keıin ony Qazaqstanda engizedi. Bul – eń mańyzdy ınvestıtsııalardyń biri, - dedi Oljas Shyntaev.
Aıta keteıik, Halyqaralyq energetıka agenttiginiń basshysy Eýropada áýe otynynyń qory mamyr aıynyń sońyna deıin ǵana jetetinin málimdedi.
