Qazaqstanda qalalar keńistikterin josparlaýdaǵy kemshilikter aıtyldy
«Qazirgi kezde ózekti máselelerdiń biri - kóshe keńistikteriniń pysyqtalmaı josparlanýy. Qazaqstandaǵy kósheler men joldar kólikterdi ótkizý múmkindigine qaraı baǵdarlanǵan. Sonymen birge, barsha álemde trend turǵyndardyń mobıldigin arttyrýǵa qaraı júrip barady. Bul turǵyda qoǵamdyq kólikti damytýǵa ekpin qoıylyp, jyldamdyq rejımin qysqartý eskerilgen», - dedi E. Áýkenov «Qalalyq keńistikti qalyptastyrýdyń jańa tásilderi týraly» atty dóńgelek ústel otyrysynda.
Budan bólek ol qala aýmaǵyn jaryqtandyrý máselesine toqtala kele, kóp jerlerde elektr jaryǵy tartylmaǵynyn, bul óz kezeginde qaýipsizdik máselesine áser etetinin jetkizdi.
Budan bólek E. Áýkenov qala keńistigin kógaldandyrý baǵyty da jetkilikti deńgeıde pysyqtalmaǵanyn aıtty.
«Kógaldandyrýdyń iri aýmaqtary keıbir jaǵdaıda fýnktsıonaldy bolmaı jatady jáne tek ásemdik fýnktsııasyna arnalǵan. Sonymen birge, ǵylymı baǵdarǵa toqtalsaq, álemde qalypty ósimdikter jıyntyǵynan qalalardy ondaǵan jyldarǵa kógaldandyrý strategııasyna aýysý júrip jatyr. Osy oraıda ár qala úshin jekeleı jasyl qordy irikteý, bir jyldyq ósimdikterdi kóp jyldyq ósimdikterge almastyrý eskerilgen. Qalalyq saıabaqtar da ózderiniń negizgi fýnktsııasyn joǵaltyp bara jatyr, ıaǵnı tabıǵattyń bir bóligi bolýy sekildi negizgi máninen alystap barady», - dedi Erlan Áýkenov.
Budan buryn habarlanǵandaı, QR Indýstrııa jáne ınfraqurylymdyq damý mınıstri Qaıyrbek Óskenbaev Qazaqstanda qalalar aýmaǵyn sapaly josparlaý standarttary engiziletinin aıtty.
Sonymen qatar, Qazaqstannyń ýrbanıster qaýymdastyǵymen birlese Berekeli Bastama daýys berý platformasy iske qosylady. Portalda qalanyń ár turǵyny ınfraqurylymdy jaqsartý boıynsha óz usynystaryn bere alady. Jobalardy mamandar ǵylymı turǵyda qarastyryp, eń úzdikteri daýys berý úshin portalda jarııalanady.
