Qazaqstanda qala qurylysy kadastrynyń 20% deregi tsıfrlandyrylǵan

ASTANA. QazAqparat - Qala qurylysy kadastrynyń derekterin tsıfrlandyrý el boıynsha 20 paıyzdy quraıdy. Bul týraly Úkimet otyrysynda memlekettik qala qurylysy kadastryn tsıfrlaý jóninde baıandaǵan QR Investıtsııalar jáne damý mınıstri Jeńis Qasymbek  aıtty, dep habarlaıdy QazAqparat.

«Kópshilik óńirlerde ınjenerlik kommýnıkatsııalar týraly derekterdi tabıǵı monopolııalar sýbektileri ártúrli formattarda qaǵaz júzinde koordınattar júıelerine baılanyssyz júrgizedi. Oblys ortalyqtaryn qospaǵanda eldi mekenderdiń qala qurylysy kadastry is júzinde qurylmaǵan. Ákimdikter usynǵan málimetter boıynsha qala qurylysy kadastrynyń derekterin tsıfrlandyrý deńgeıi búkil el boıynsha ortasha eseppen 20 paıyzdy quraıdy», - dedi mınıstr.

Onyń dereginshe, barlyq eldi mekenderdiń ınjenerlik jelileri men kommýnıkatsııalary Qyzylorda oblysy men Astana qalasynda 100 paıyz, Almaty qalasynda taýly jerdi qospaǵanda 80 paıyz tsıfrlandyrylǵan.

«Ákimdikterdiń derekteri boıynsha  qala qurylysy kadastrynyń tsıfrlyq derekteri Qaraǵandy jáne Taldyqorǵan qalalarynda 100, Oral qalasynda 95, Atyraý qalasynda 80, Kókshetaý qalasynda 46, Shymkent qalasynda 32 jáne Pavlodar qalasynda 11 qalyptastyryldy. Aqtóbe, Soltústik Qazaqstan, Shyǵys Qazaqstan, Mańǵystaý, Qostanaı jáne Jambyl oblystarynda bir de bes júz masshtabty kadastrdyń tsıfrlyq derekteri is júzinde joq», - dedi Jeńis Qasymbek.