Qazaqstanda qaǵaz óndiretin jańa kásiporyn ashylady
NUR-SULTAN. QazAqparat - 2019 jyldyń alǵashqy tórt aıynda qaǵaz óndirý kólemi 21 mlrd teńgeni qurady. Bul týraly QR Indýstrııa jáne ınfraqurylymdyq damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Qanat Baıytov málimdedi, dep habarlaıdy QazAqparat.
«Qaǵaz ben qaǵaz ónimderi óndirisiniń basym bóligin karton-qaǵaz ónerkásibi quraıdy. Qazaqstan ormanǵa baı emes. Qazirgi ýaqytta karton-qaǵaz óndiretin ónerkásipter shıkizat retinde qaıta óńdelgen qaǵaz ben kartondyq makýlatýrany qoldanady», - dedi Qanat Baıytov elordada ótken tsellıýloza-qaǵaz ónerkásibin damytý týraly forýmda. 
Onyń aıtýynsha, 2015-2018 jyldary qaǵaz ben qaǵaz ónimderi óndirisi aıtarlyqtaı artqan. Óndiris kólemi 45 mlrd teńgeden 58 mlrd teńgege deıin kóterilgen.
«Qazaqstandaǵy negizgi óndirýshiler - «Qazaqstan qaǵazy» AQ, Kagaz Recycling, Karına Trading jáne Qaraǵandy tsellıýloza-qaǵaz kombınaty. 2015-2018 jyldary memlekettik baǵdarlamany júzege asyrý aıasynda qattalǵan karton, dárethana qaǵazy men qaǵaz qapshyq shyǵaratyn úsh joba qurylyp, 82 jańa jumys orny ashyldy. 2019 jyly taǵy bir joba - Intermýltıservıs aıasynda taǵy 60 jumys orny ashylady», - dedi komıtet tóraǵasy.
