Qazaqstanda qaǵaz qaldyqtaryn shet elge shyǵarýdy shekteý usynyldy
ShYMKENT. QazAqparat - Qaǵaz qaldyqtaryn shetelge shyǵarýdy shekteý kerek. Makýlatýradan karton shyǵaratyn «Býmprom» kompanııasy basshysynyń orynbasary Serik Tashnazarov osylaı málim etti, dep habarlaıdy QazAqparat.
OQO ákiminiń baspasóz qyzmetiniń málimetinshe, atalmysh kompanııa qaǵaz qaldyqtarynan aıyna 350 tonna karton shyǵarady.
Zaýytqa qajetti shıkizat Qyzylorda, Almaty, Shymkent qalalarynan tasymaldanady. Búginde zaýyt basshylyǵy óndiriske qajetti qaǵaz qaldyqtarynyń bir kelisin 40 teńgeden satyp alyp otyr.
«Zaýyt toqtaýsyz jumys isteýi úshin qaǵaz qaldyqtary ıaǵnı maklatýra qajet. Qazirgi tańda shıkizattyń baǵasy kúnnen kúnge ósip jatyr. Óıtkeni bizdiń naryqtaǵy qaǵaz qaldyqtaryn ózbekstandyq kásipkerler satyp alý ústinde. Olar búginde makalatýranyń bir kelisiniń baǵasyn 60 teńgege deıin kóterip jiberdi. Sondyqtan «Atameken» kásipkerlik palatasyna shıkizattyń osy túrin shet elge shyǵarýǵa shekteý qoısa degen usynysymyzdy joldadyq», - deıdi kásiporyn basshysynyń orynbasary Serik Tashnazarov.
«Býmprom» JShS - 2016 jyly jyly iske qosylǵan jobalardyń biri, «Ońtústik» ındýstrııaldyq aımaǵynda ornalasqan. Jobanyń jalpy quny 200 mln teńge. Kásiporyn jylyna 4 myń, al aıyna 350 tonna ónim shyǵarýǵa qaýqarly. Búginde munda 30 adam jumyspen qamtylǵan.
Zaýytta toqtaýsyz jumys istep turǵan qondyrǵy Qytaıdan arnaıy ákelingen. Qaǵaz qaldyqtaryn jibitip, qaıta karton etetin qurylǵyda jergilikti azamattar jumys isteıdi. Olarǵa qytaılyq mamandar qondyrǵymen jumys isteýdi arnaıy oqytqan.
Qazirgi tańda zaýyt ónimderine suranys mol. Ásirese, tapsyrystar Pavlodar, Qaraǵandy, Almaty oblystarynan jıi túsedi. Aldaǵy ýaqytta kásiporyn basshylyǵy óz ónimderin kórshiles Ózbekstan, Qyrǵyzstan memleketterine jóneltýdi josparlap otyr.
