Qazaqstanda kadrlyq qajettilik qalaı boljanady

NUR-SULTAN. QazAqparat - Qazaqstanda eńbek naryǵyn jańǵyrtý jáne jańa ózgeristerge daıyndaý júrgizilip jatyr. Bul týraly búgin halyqpen eseptik kezdesý ótkizip jatqan Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.

Mınıstrdiń sózine qaraǵanda, kadrlarǵa qajettilikti boljaýdyń mynadaı úsh deńgeıli ulttyq júıesi engiziledi: qysqa merzimdi kezeń (1 jyl), orta merzimdi kezeń (5 jyl), uzaq merzimdi kezeń (2050 jyl).

«Ol bizge búgin jáne 5-10 jyldan keıin qandaı jáne qansha maman qajet ekenin túsinýge, sondaı-aq eńbek resýrstary aǵynynyń baǵyttary men sharttaryn anyqtaýǵa múmkindik beredi. Nátıjeleri orta jáne joǵary bilimi bar kadrlardy daıarlaýǵa arnalǵan memlekettik bilim berý tapsyrysyn qalyptastyrý kezinde, qysqa merzimdi jáne qaıta daıarlaýdy uıymdastyrý kezinde qoldanylatyn bolady», - dedi B.Saparbaev.

Sondaı-aq, ol Ulttyq biliktilik júıesin qalyptastyrý jalǵasyp jatqanyn aıtty.

«Qazirgi tańda 106 kásibı standart ázirlendi. Onda jumys berýshilerdiń qyzmetkerlerdiń bilimine, daǵdylary men quzyretterine qoıylatyn talaptary kórsetilgen. Aǵymdaǵy jyly 12 basym sala boıynsha 480 kásibı standart pen 38 salalyq biliktilik aıasyn ázirleý jáne qabyldaý josparlanýda. Kásiptik standarttar negizinde bilim berý baǵdarlamalary jańartylady», - dedi mınıstr.

Onyń aıtýynsha, salalyq jumys berýshilerdi kásiptik standarttar ázirleýge tartý úshin 2019 jyly jobalyq top quryldy. Oǵan salalyq mınıstrlikterdiń basshylary kiredi. Mınıstrlik biliktilik júıesin odan ári damytý úshin halyqaralyq sarapshylardy tarta otyryp, Ulttyq biliktilik júıesin damytý jónindegi 2025 jylǵa deıingi jol kartasyn ázirlep jatyr. Ol ekinshi jartyjyldyqta qabyldanady.