Qazaqstanda kadr bólimderiniń jumystaryn ózgerister kútip tur

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi kadrlyq qyzmettiń jańa formatyn engizýde. Bul týraly osy Agenttiktiń tóraǵasy Alık Shpekbaev aıtty, dep habarlaıdy QazAqparat.

Vedomstvonyń keńeıtilgen alqa májilisinde personaldy basqarý qyzmetin jańǵyrtýdyń mańyzdylyǵyna toqtalǵan A. Shpekbaev «Qazirgi tańda kadr qyzmetiniń jumysy jumysqa qabyldaý nemese jumystan bosatý boıynsha buıryqtar daıyndaý men rásimdeýge, sonymen qatar, formaldy tártiptik baqylaýǵa negizdelgen», -  dedi ol vedomstvonyń keńeıtilgen alqa otyrysynda.

Onyń sózine qaraǵanda, kadrlyq bólim  kadrlyq is-qaǵazdardy júrgizýmen birge eń tıimdi kandıdattardy irikteýge, quzirettilikti basqarýǵa jáne qyzmetkerlerdiń kásibı damýyna, olardyń jumystarynyń tıimdiligin arttyrýǵa, personaldy damytý baǵdarlamasyn ázirleýge jáne júzege asyrýǵa baǵyttalýy tıis. Sonymen qatar personaldy basqarý máseleleriniń aıasynda áleýmettik-psıhologııalyq dıagnostıkadan memlekettik organnyń kadrlyq áleýetin taldaýǵa deıingi máselelerdi qamtýy tıis.  HR-qyzmetter ujymdaǵy qolaıly psıhologııalyq ahýaldyń qalyptasýyna jaýapty. 

«Qujattarmen jumys isteýden adamdarmen jumys isteýge kóshý qajet. Buǵan baıyptylyqpen qaraýlaryńyzdy suraımyn. Óz tarapymyzdan, biz ádistemelik kómek kórsetetin bolamyz», -dedi Alık Shpekbaev jaýapty hatshylar men apparat basshylaryna qarata aıtqan sózinde.

Osy oraıda ol  osy baǵyttaǵy alǵashqy qadamdardy Agenttik jasaıtynyn atap ótti.

«Aǵymdaǵy jyly biz «Jalpy qyzmet kórsetý ortalyǵy» ıdeıasy negizinde kadrlyq qyzmetterdiń jumysynda túbegeıli jańa formatqa kóshemiz. ıAǵnı, memlekettik apparatty ońtaılandyrý máninde ózekti bolyp tabylatyn barlyq kadrlyq úderister biryńǵaı Agenttiktiń bólimshelerinde júrgiziletin bolady» - dep sózin qorytyndylady.