Qazaqstanda kadet synyptary qaryshtap damyp keledi

TALDYQORǴAN.QazAqparat - Almaty oblysynda quqyq qorǵaý baǵytyn negizge alǵan elimizdegi alǵashqy kadet synybynda bilim alýshylardyń sleti uıymdastyryldy. Ótegen batyr kentinde uıymdastyrylǵan is-sharaǵa Taldyqorǵan qalasy men Іle aýdanynyń mektepterindegi 150-den astam kadet qatysty, dep habarlaıdy QazAqparat tilshisi.

Almaty oblysynda negizi qalanǵan «Jas polıtsııa» kadet qozǵalysy suranysqa sáıkes damý ústinde. Qazirgi tańda tórt jalpy bilim beretin mektepte 5 kadet synyby jumys jasaıdy. Pılottyq joba retinde alǵashqy kadet synyby byltyr Іle aýdany Ótegen batyr kentiniń №7 orta mektebinde ashyldy. Budan keıin osyndaı synyptar aýdannyń basqa úsh mektebinde ashyldy. Polıtsııalyq baǵytty ustanǵan alǵashqy kadet synybyn ashý ıdeıasyn, keıinnen «Jas polıtsııa» jobasyn odan ári damytýǵa oblys basshysy Amandyq Batalov qoldaý kórsetti.

«Kadetterdiń alǵashqy sletin ótkizý týraly sheshim qabyldaý kezinde Іle aýdany Ótegen batyr kentindegi №7 orta mektebi tańdap alyndy. Óıtkeni, osy mektepte quqyq qorǵaý baǵytyn negizge alǵan alǵashqy kadet synyby ashylǵan bolatyn. ıAǵnı,  elimizdegi «Jas polıtsııa» qozǵalysynyń bastaý alǵan jeri. Іs-sharada balalar bir-birimen kezdesti, ártúrli baǵytta óz ónerlerin ortaǵa saldy. Kadet qozǵalysyn damytý boıynsha oılary men usynystaryn ortaǵa saldy. Jalpy aıtqanda, ortaq múdde aıasynda jaqynyraq tanysty», - dep málimdedi Almaty oblysy Polıtsııa departamentiniń baspasóz qyzmeti.

Sondaı-aq, oblystyq sletke shekara áskeri jelisi boıynsha bilim alatyn Іle aýdanynyń №38 mektebiniń kadetteri de qatysty. Іs-shara barysynda sletke kelgen kadetter qarý-jaraqty bólshekteý jáne ony qaıta qurastyrý, saptyq ánderdi oryndaý, saptyq daıyndyq boıynsha óz bilgenderimen tánti etse, sońynda kórermenderge án men kúıden shashý shashty.

Aıta keteıik, bıyl Qazaqstan Respýblıkasynyń Іshki ister mınıstri polıtsııa general-polkovnıgi Qalmuhambet Qasymov Іle aýdanynyń kadetterin qabyldap, kadet qozǵalysyna oń pikir bildirdi jáne tálim alýshylardyń daǵdysy men daıyndyǵyna óte joǵary baǵa berdi.

«Jas polıtsııa» jobasy tıisti nátıjesin berdi. Bilim alýshylardyń úlgerimi men qyzyǵýshylyǵy artyp, tártibi jaqsardy. Dene bitiminiń durys qalyptasýymen qatar, elimizdiń shynaıy patrıoty bolýyna yqpal etetin synypqa qazirgi tańda ata-analar tarapynan suranys artyp keledi. Osyǵan oraı, oblysymyzdyń basqa aýdandarynda da kadet synyptaryn ashý josparymyzda bar. Eń aldymen, Úsharal jáne Qapshaǵaı qalalarynda ashylýy múmkin», - dep atap ótti atalǵan vedomstvanyń baspasóz qyzmeti.