Qazaqstanda kádege jaratý baǵdarlamasy qalaı jumys isteıdi
ASTANA. KAZINFORM – Qazaqstanda avtoparkti jańartý jáne eski kólikterdi kádege jaratý jumystary júrip jatyr. Alaıda turǵyndar arasynda kólikti ótkizý tártibi, baǵdarlamaǵa qatysý talaptary men qarastyrylǵan ótemaqyǵa qatysty suraqtar jıi týyndaıdy. Osyǵan baılanysty Kazinform agenttiginiń tilshisi Ekologııa jáne tabıǵı resýrstar mınıstrligine resmı saýal joldap, baǵdarlamanyń qalaı jumys isteıtinin anyqtady.
Kádege jaratý júıesi qalaı jumys isteıdi
Mınıstrliktiń málimetinshe, buǵan deıin kólik quraldaryn jınaý, tasymaldaý jáne qaıta óńdeý jumystaryn jeke operator júrgizgen. Keıin óndirýshilerdiń keńeıtilgen mindettemeleri júıesi ózgerip, operator qyzmeti «Jasyl damý» AQ-ǵa berildi. Osydan keıin baǵdarlama jańartylǵan tártippen qaıta iske qosyldy.
Qara metaldy qaıta óńdeýmen aınalysatyn barlyq kásipkerlik sýbektileri bul jumysqa qatysa alady. Mundaı tásil naryqtaǵy básekelestikti saqtaýǵa jáne qyzmettiń bir uıymnyń qolyna shoǵyrlanýyna jol bermeýge múmkindik beredi.
Qaıta óńdeýmen aınalysatyn kásiporyndar ekologııalyq jáne sanıtarlyq talaptarǵa saı barlyq ruqsat qujattaryn alýy tıis. Olardyń qyzmeti memlekettik baqylaýda bolady.
Kólikti ótkizý tártibi qandaı
Kólikti kádege jaratý eki kezeńnen turady. Aldymen qaıta óńdeýshi uıymmen kelisim jasalyp, keıin kólik quralyn ótkizýge ótinim beriledi.
Qujat tapsyrý tártibi, kólikke qoıylatyn talaptar jáne ony jetkizý sharttary arnaıy erejelermen bekitilgen.
Qajetti qujattar tizimi kólik túrine qaraı ózgeredi jáne tıisti normatıvtik qujattardyń qosymshalarynda kórsetilgen.
Qabyldanǵan kólik qaıta óńdeýge jiberiledi. Onyń quramynan qaıta paıdalanýǵa jaramdy materıaldar men bólshekter alynady. Ekologııalyq talapqa sáıkes óńdeýge kelmeıtin qaldyqtardyń kólemi tehnıka salmaǵynyń 5%-ynan aspaýy tıis.
Qandaı tehnıka qabyldanady jáne qandaı jeńildikter bar
Baǵdarlama jeńil jáne júk kólikterin, avtobýstardy, sondaı-aq ózdiginen júretin aýyl sharýashylyǵy tehnıkasyn qamtıdy.
Mınıstrliktiń málimetinshe, tehnıka jasyna qatysty naqty shekteý joq. Negizgi talap – kóliktiń belgilengen talaptarǵa saı bolýy jáne qabyldaý erejeleriniń saqtalýy.
Baǵdarlamaǵa qatysýshylarǵa Qazaqstanda óndirilgen ekologııalyq taza kólik nemese aýyl sharýashylyǵy tehnıkasyn satyp alýǵa jeńildik sertıfıkaty beriledi.
Sertıfıkat bir jyl boıy jaramdy. Ony basqa adamǵa úsh retke deıin berýge bolady. Sondaı-aq belgilengen shek aıasynda birneshe sertıfıkatty qatar paıdalanýǵa ruqsat etiledi.
Jeńildik mólsherin ındýstrııalyq damýdy memlekettik qoldaý salasyndaǵy ýákiletti organ aıqyndaıdy.
Baǵdarlama aıasynda qansha tehnıka qabyldandy
Mınıstrliktiń deregine sáıkes, jeke operator jumys istegen kezeńde, ıaǵnı 2016 jyldan 2022 jyldyń qańtaryna deıin kádege jaratýǵa 218 myńnan astam tehnıka qabyldanǵan.
Onyń ishinde 215 myńnan astamy avtokólik bolsa, 3,5 myńnan astamy aýyl sharýashylyǵy tehnıkasy bolǵan.
Qazir qaıta óńdeýshi kásiporyndardy irikteý jumystary jalǵasyp jatyr. Bul jumys aıaqtalǵannan keıin qabyldaý pýnkteriniń jańartylǵan tizimi operatordyń resmı ınternet-resýrsynda jarııalanady.
Ekologııa mınıstrliginiń málimetinshe, kádege jaratý júıesi aldaǵy ýaqytta jınaqtalǵan tájirıbe men naryq qatysýshylarynyń usynystary negizinde jetildiriledi. Baǵdarlama ekologııalyq standarttardy damytýǵa jáne turǵyndar úshin qoljetimdilikti arttyrýǵa baǵyttalǵan.
Buǵan deıin Kazinform agenttigi qazaqstandyqtardyń nelikten eski avtokólikterin kádege jarata almaı júrgeni týraly jazǵan edi.
