Qazaqstanda kádi men baıaldy qansha turady
ASTANA. KAZINFORM – Qazaqstandaǵy saýda oryndarynda bıylǵy ónimder, ıaǵnı kádi men baıaldy (baklajan) paıda bola bastady. Osy oraıda kókónis qaı óńirde arzan bolatyny jaıynda málimetti kópshilik nazaryna usynýdy jón kórdik.
Kádiniń kelisi 97 teńgeden bastalady
Saıajaı turǵyndary kóp ósiretin osy kókónis qazir qolaıly baǵada satylyp jatyr. Osy oraıda kádi Qaraǵandyda tıimdirek saýdalanyp otyr. Osy óńirde kelisin 97 teńgeden tabýǵa bolady. Odan keıin Almatyda - kelisi 100 teńge, al Qonaev pen Taldyqorǵanda 100-den 120 teńgege deıin.
Jezqazǵan turǵyndary kádiniń kelisin 120 teńgeden satyp alsa, Semeı men Óskemende 120-200 teńge aralyǵynda.
Oralda kádiniń kelisi 150 teńge, Túrkistanda - 200 teńge, Pavlodarda - 300 teńge, Astanada 295 teńge shamasynda. Sondaı-aq Tarazda osy kókónistiń ortasha baǵasy 300 teńge.
350-den 400 teńgege deıingi baǵalar Petropavl, Qyzylorda, Kókshetaý, Qostanaı jáne Aqtóbe qalalarynda tirkelgen. Aqtaýda bir kelisiniń baǵasy 500 teńge, al Atyraý men Shymkentte 550 teńgege deıin barady. Bul turǵyda osy qalalarda kádi eń joǵary baǵada ekenin baıqaýǵa bolady.
Baıaldynyń kelisi 890 teńgege deıin jetken
Baıaldynyń eń qolaıly baǵasy Tarazda baıqaldy, onyń kelisi 200-240 teńge turady. Almatyda ony 200-350 teńgege, Túrkistanda 300-350 teńgege, al Shymkentte 300-450 teńge aralyǵynda satyp alýǵa bolady.
Odan keıingi orynda Qonaev (350-400 teńge) jáne Qyzylorda (350 teńge) tur.
Pavlodar men Taldyqorǵanda jańa pisken baıaldynyń kelisi 400 teńge shamasynda bolady. Kókónistiń baǵasy Qaraǵandyda sál joǵary – 455 teńge. Jezqazǵan men Aqtóbede quny 550 teńge, Qostanaıda - 590 teńge.
Semeı men Óskemende onyń quny 600 teńge bolsa, Astanada 619 teńge turady.
Kókshetaýlyqtar kókónisti 650 teńgeden, Atyraý men Aqtaýda kelisin 700 teńgeden satyp alady. Petropavlda – 700 teńgeden 750 teńgege deıin.
Eń joǵary baǵa Oralda boldy – baıaldynyń kelisi 890 teńge.