Qazaqstanda «Jibek Joly» radıosy óz jumysyn bastady
ASTANA. KAZINFORM – QR Prezıdenti Teleradıokesheniniń jańa «Jibek Joly» radıosy óz jumysyn bastady. Áýe tolqynynda alǵashqy merekelik tańǵy efır ótip jatyr, dep habarlaıdy Kazinform tilshisi.
Jańa radıo «Astana» radıosynyń bazasynda quryldy jáne 101.4 FM jıiliginde habar taratýdy jalǵastyrady. Radıo qazaq jáne orys tilderinde habar taratady.
Alǵashqy merekelik efırdi QR Prezıdenti Teleradıokesheni «Jibek Joly» telearnasynyń juldyzdy júrgizýshileri – Aıgúl Múkeı men Ánýar Kárbozov júrgizip jatyr. Budan bólek, kún saıyn saǵat 7:00-de Jasulan Aısaǵalı men Dılbar Jumekenova tikeleı efırde «Tańǵy Espresso» shoýyn ótkizedi.
Al radıonyń bas redaktory Beknur Nurmaǵanbet pen júrgizýshi Qyrmyzy Jandosova «JJ PRIME» keshki shoýyn júrgizedi. Sondaı-aq ár saǵat saıyn efırden ózekti jańalyqtar berilip otyrady.
− Bul tusaýkeserge birneshe aı daıyndaldyq, jumys áli de jalǵasyp jatyr. Radıoformatty ózgertý, mýzykalyq bazany jańartý — bir kúnde sheshiletin sharýa emes. Lıtsenzııalaý, avtorlyq quqyq máseleleri bar, sondyqtan protsess áli júrip jatyr. Bizdiń basty maqsatymyz – tabysty radıo kontseptsııasyn qurý, tyńdarmandar qataryn keńeıtý jáne jańa formattaǵy BAQ bolý. Radıo mýzykaǵa, kóńil kúı men emotsııaǵa basymdyq beredi, radıo qasyńda otyrǵan dosyńdaı áser beredi. Bizdi kóbirek adam tyńdap, ár tańy men keshin bizben ótkizse, jańalyqtardy bizden bilse deımiz. Bul rette óte keń aýdıtorııaǵa baǵyttalyp otyrmyz, tyńdarmandarymyz belsendi ómir saltyn ustanatyn, el men qalada, álemde bolyp jatqan oqıǵalarǵa beıjaı qaramaıtyn azamattar bolady dep oılaımyz, − deıdi «Jibek Joly» radıosynyń jetekshisi Natalıa Býrenkova.
«Jibek Joly» − eń talǵampaz aýdıtorııaǵa arnalǵan mýzyka men erkin suhbat, ózekti kontent alańy bolmaq. Radıo jańa talanttardy tanystyryp, Qazaqstannyń zamanaýı mýzykasyn ilgeriletý formattaryn engizedi.
Al «Jibek Joly» án festıvalinde Qazaqstannyń jańa mýzykalyq býyn ókilderi tyńdarmanyn qýanta túspek. Olardyń ánderi radıonyń biregeı avtorlyq pleılısine qosylady. Sondaı-aq Ortalyq Azııa elderinen jas, zamanaýı, qyzyqty oryndaýshylardy tartyp, aýdıtorııany keńeıtýdi kózdeıdi.
Sondaı-aq jańa radıo Teleradıokeshen quramyndaǵy Jibek Joly telearnasymen, Kazinform agenttigimen birlesken kollaboratsııalar jasaýdy, Ortalyq Azııa aýdıtorııasyna shyǵýdy, Ortalyq Azııa oryndaýshylarymen jumys istep, olardyń shyǵarmashylyǵyn tanystyrýdy kózdep otyr.
Kún saıyn radıoefır Dımash Qudaıbergenniń oryndaýyndaǵy Qazaqstan Respýblıkasynyń Ánuranymen bastalady. Tanymal ánshiniń oryndaýynda Prezıdent Teleradıokesheni túsirgen edi.
Eske sala ketsek, 16 sáýirde elordada ótken II Ortalyq Azııa medıaforýmynda aımaqtyń aqparattyq yntymaqtastyǵyn jandandyrý, ortaq SilkWay telearnasyn qurý bastamalary aıtylǵan edi.
Sondaı-aq, Mádenıet jáne aqparat mınıstri Aıda Balaeva Ortalyq Azııa elderimen qandaı medıajobalar jasalatynyn aıtty.