Qazaqstanda izdeý jarııalanǵan qylmysker Reseıde ustaldy
KÓKShETAÝ. QazAqparat – Aqmola oblysynda Qylmystyq kodekstiń eki birde baby boıynsha qylmys jasap, shetelge qashyp ketken qylmysker Reseıde qolǵa tústi, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, 2020 jylǵy qarashanyń 13-de Reseı Federatsııasy Orlov oblysynyń Mtsensk qalasynda uıymdastyrylǵan jedel-izdestirý is-sharasy kezinde reseılik tártip saqshylary 27 jastaǵy er adamdy ustady.
«Anyqtalǵandaı, er adamǵa 2015 jyldan beri Kókshetaý qalalyq Polıtsııa basqarmasy Qylmystyq kodekstiń 106 baby 2 bóligi (densaýlyqqa qasaqana aýyr zııan keltirý) jáne 293 baby 2 bóligi (buzaqylyq) boıynsha eki qylmystyq is boıynsha izdeý jarııalaǵan», - deıdi vedomstvodan.
Eske sala ketsek, 2015 jyldyń 10 qańtarynda saǵat 05:10 shamasynda Kókshetaý qalasyndaǵy «Servıs plıýs» qonaqúıiniń janynda mas úsh adamnyń arasynda kelispeýshilik týyndaıdy. Sol kezde 27 jastaǵy er adam qasynda bolǵan tanystaryna sebepsiz, buzaqylyq nıetpen jaraqat salady.
Sot-medıtsınalyq saraptamanyń qorytyndysyna sáıkes zardap shegýshiniń bireýine aýyr zııan keltirilgen.
Qylmystyq isterdi tergeý barysynda kúdikti polıtsııa qyzmetkerlerinen qashyp ketken. Sot úkimi shyqqannan keıin kúdiktige halyqaralyq izdeý jarııalandy. Baǵdarlar kórshi memleketterdegi áriptesterge baǵyttalǵan bolatyn. Qabyldanǵan sharalar oń nátıjesinde kúdikti kórshi elden ustaldy.
«Kúdiktige qatysty «kúzetpen ustaý» protsessýaldyq májbúrleý sharasy tańdaldy. Qylmysker Mtsensk qalasyndaǵy «Mtsenskıı» Reseı ІІM ýaqytsha ustaý ızolıatoryna qamaýǵa alyndy. Qazirgi ýaqytta polıtsıeıler ekstradıtsııalaý máselesin sheship jatyr», - dep tolyqtyrdy vedomstvodan.
