Qazaqstanda izdeý salynǵan qylmysker Nıý-Iorkte ustaldy
NUR-SULTAN. QazAqparat - AQSh-tyń Nıý-Iork qalasyndaǵy Kóshi-qon jáne keden basqarmasynyń qyzmetkerleri 12 sheteldik qashqyndy ustady, onyń arasynda Qazaqstan azamaty da bar, dep habarlaıdy QazAqparat.
«Arnaıy 5 kúndik operatsııa arqyly óz elderinde qylmys jasap, Nıý-Iorkte bas saýǵalaǵan ondaǵan sheteldik qylmysker ustaldy. Bizdiń elimiz sheteldik qylmyskerlerdiń sot qýdalaýynan qashyp, panalaıtyn jerine aınalmaýy tıis», - deıdi Nıý-Iorktegi Kóshi-qon basqarmasynyń májbúrli atqarý jáne shyǵarý bóliminiń basshysy Tomas R. Deker.
Qalǵandarynyń arasynda Argentına, Qytaı, Chılı, Kolýmbııa, Japonııa, Qazaqstan, Meksıka, Reseı azamattary bar. Nıý-Iorktiń Bronks aýdanynda 27 jastaǵy qazaqstandyq ustalǵan. Ony Qazaqstannyń quqyq qorǵaý organdary tonaý qylmysy úshin bes jyldan beri izdestirgen. Barlyǵy ázirge Kóshi-qon jáne keden basqarmasynyń qamaýynda sot tyńdalymyn kútip otyr.
Óz kezeginde, Qazaqstannyń Syrtqy ister mınıstrligi oqıǵa jóninde pikir bildirdi. Qazaqstannyń Bas Konsýldyǵy bul aqparatty tekserip jatyr jáne polıtsııadan esh resmı aqparat túspegen.
