Qazaqstanda ıtterdiń shabýylynan 177 myń adam zardap shekti
ASTANA. QazAqparat - Búgin Parlament Májilisiniń jalpy otyrysynda depýtattar úı janýarlaryn dalaǵa qańǵytyp jibergenderdi jaýapkershilikke tartý máselesin kóterdi. Osy oraıda QR Úkimet basshysy Baqytjan Saǵyntaevtyń atyna depýtattyq saýal joldandy, dep habarlaıdy QazAqparat.
«Ókinishke qaraı, bir bala birneshe pıtbýltererdiń talaýynan jantúrshigerlik jaǵdaıda qaıtys bolǵan edi. Bul kezdeısoq jaǵdaı emes. QR Densaýlyq saqtaý mınıstrligi usynǵan resmı aqparat boıynsha ótken úsh jylda elimizdiń aýmaǵynda ıtterdiń shabýylynan 177 myń adam zardap shekse, al bıyldyń 6 aıynda 29 878 adam jaraqat aldy. Elimizde kún saıyn 160-tan astam adam ıtterdiń shabýylyna tap bolady. Bul tek resmı tirkelgen soraqy jaǵdaılar. Kórip otyrǵanymyzdaı, jyl saıyn bul jaǵdaılar qaıtalanyp, azaımaı otyr. Osyǵan baılanysty atqarýshy organdar atalǵan máseleni retke keltirý boıynsha qashan naqty sharalar qabyldaıdy?» - dep toqtaldy depýtat Ersultan Bekturǵanov.
Onyń sózine qaraǵanda, búginde qala jáne aýyl kóshelerinde bos júrgen qańǵybas ıtter óte kóp. Olar top-tobymen júrip halyqqa úlken qaýip tóndiredi ári juqpaly aýrýlar taratý kózi bolyp otyr. Elimizde ıtterge vaktsına egý máselesi de qaraýsyz qalǵan.
«Qazirgi kezde keıbir aýyldarda balalardyń mektepke jaıaý barýy da qaýipti bolýda. Ásirese, qys kezinde kún erte batyp, kesh shyǵatyn ýaqytta ıtterdiń oqýshylarǵa úreı týǵyzyp, olardyń oqýǵa barýyna kedergi bolǵan jaǵdaılary da kezdesip jatyr. Onyń ústine, úı janýarlaryn asyraıtyn adamdar olardy asyraý men serýendetý qaǵıdalaryn saqtamaıdy. It ıeleri olardy qoǵamdyq jáne balalar oınaıtyn jerlerde, sport alańdarynda serýendetý kezinde tazalyqqa da mán bermeıdi. Úı janýarlary júrgen jerdi tazalap ketý degen múldem joq», - dedi Ersultan Bekturǵanov.
Sonymen qatar ol ıtter men mysyqtarǵa arnalǵan ustaý oryndary joqtyń qasy ekenin atap ótti. Úı janýarlaryn dalaǵa qańǵytyp jiberý de kún saıyn kóbeıip barady. Ol úshin ıeleri eshqandaı jaýapkershilikke tartylmaıdy.
«Mysaly, Ekonomıkalyq yntymaqtastyq jáne damý uıymy elderinde úı janýarlaryn kóshege qańǵyrtyp jibergeni úshin 25 myń eýrodan bastalatyn aıyppul salynady, al keıbir jaǵdaılarda bir jylǵa deıin bas bostandyǵynan aıyrady», - dedi depýtat.
E. Bekturǵanov joǵaryda aıtylǵandardy eskere otyryp, respýblıka deńgeıinde ıtter men mysyqtardy asyrap, saqtaýǵa baılanysty jalpyǵa ortaq biryńǵaı bir tıptik qaǵıdalardy bekitýdi qarastyrýdy surady.
