Qazaqstanda ІT salasynda 900 myń jańa jumys orny ashylady
«Tańdaıtyn mamandyǵymyz bizdiń ómirlik jolymyzdy aıqyndap beredi. Bul tańdaý álbette óte ońaı emes. Ózderińiz baıqap otyrǵandaı, álemdik tendentsııa qazir ózgerip, barlyq mamandyqtar, eńbek naryǵy tolassyz ózgeristerdi bastan keshirip jatyr. Buryn myzǵymastaı kóringen mamandyqtardyń qazir keıbiri tipti joıylyp ketti. Sonymen qatar, buryn bolmaǵan jańa mamandyqtar paıda bola bastady. Bálkim ózderińiz biletin bolarsyzdar, máselen murja tazalaýshy degen mamandyqty sizder qazir tek ertegilerden ǵana kezdestirýlerińiz múmkin. Tehnologııanyń qalaı ózgerip kele jatqanyn da kórip otyrsyzdar. Biz qazir buryn eshqashan estimegen smartfondardy ustap júrmiz», - deıdi ol.
Nurjan Áltaevtyń aıtýynsha, jaqynda ǵana jańalyqtardan AQSh-tyń Boston qalasynda tolyq túrde robottandyrylǵan meıramhana ashylǵany habarlanǵan.
«Ol jerde daıashy da, aspazdar da jumys istemeıdi. Elestetip kórińiz. Ashylǵanyna az ýaqyt bolsa da onda kelip tamaqtanǵysy keletinderdiń kezegi uzyn sonar. Demek, qazir ol álem úshin jańalyq bolyp otyrǵan shyǵar. Alaıda 2-3 jyldan keıin mundaı meıramhanalar tipten kóp ashylýy múmkin. Birneshe jyl buryn ǵana zańger mamandyǵyna bári oqyǵysy keletin. Al qazir keıbir salalarda olardyń qajettiligi bolǵanymen, reseılik Sberbank tolyǵymen korporatıvtik zańgerlerden bas tartty. Óıtkeni, qazir ol bankte kez kelgen normatıvti-quqyqtyq qujatty aına-qatesiz zańgerlerden tez taýyp bere alatyn kompıýterlik baǵdarlama jumys istep tur», - deıdi ol.
Áltaevtyń aıtýynsha, jahandyq tsıfrlandyrý salasynda ІT-salasyndaǵy mamandyqtarǵa suranys joǵary bolady.
«Kóliktik, logıstıkalyq, týrızm salasynda jańa jumys oryndary kóptep ashylady. ІT-tehnologııalarǵa baılanysty da jaǵdaı sondaı bolmaq. Qazaqstanda qazirgi tańda «Tsıfrly Qazaqstan» baǵdarlamasy júzege asyrylýda. Osy sebepti osy salada ashylatyn jumys oryndarynyń sany kóp bolmaq. Bizdiń esepteýimizshe, 2025 jyly dál osy salalarda 900 myń jumys oryny ashylady. Bul vakantsııalarǵa qysqartylǵan mamandyqtardyń ıelerin jumysqa turǵyzýǵa bolady. Mine, osy vakantsııalar sizderdi kútip tur», - dedi Áltaev óz sózinde.
