Qazaqstanda ІT salasyn damytý úshin eń birinshi bilimge kóńil bólý kerek - Úkimet basshysy
ASTANA. Qyrkúıektiń 17-ci. QazAqparat /Qanat Mámetqazyuly/ - Qazaqstanda ІT salasyn damytý úshin eń birinshi kezekte bilimge kóńil bólý kerek. Búgin Qazaqstan ІT-kompanııalarynyń ІІ-sezine qatysqan Úkimet basshysy Kárim Másimov osylaı málim etti.
«Sońǵy birneshe apta boıy Úkimette, ekonomıkany jańǵyrtý komıssııasynda aqparattyq tehnologııalar salasyn damytý jaıynda áńgimeler boldy. Men sol otyrystardyń barlyǵynda ІT salasyn damytýǵa qatysty óz pikirimdi bildirip kelgen edim. Búgingi basqosýdy paıdalana otyryp, ony taǵy da ortaǵa salǵym keledi. Meniń oıymsha, ІT salasyn damytý úshin eń aldymen bilim máselesine basa nazar aýdarǵan lázim», dedi Kárim Másimov. Úkimet basshysynyń aıtýynsha, ІT salasyn damytý maqsatynda memlekettik tapsyrystardy arttyryp, qarajat ta jetkilikti bólinýi tıis.
«Shyndyǵynda, jan basyna shaqqanda bizde mamandar aıtarlyqtaı jetkiliksiz. Bútkil respýblıka boıynsha mamandar tapshylyǵyn sheshpeı turyp, básekelestikti de jolǵa qoıa almaıtynymyz anyq. Bilikti mamansyz sala esh kógermeıdi. Sondyqtan da, ІT salasyn damytýdaǵy basty másele - bilim. Sol úshin Bilim jáne ǵylym mınıstri men Baılanys jáne aqparat mınıstrine osy máseleni sheshýdi júkteımin», dedi Premer-Mınıstr.
Esterińizge sala keteıik, búgingi jıyn barysynda Baılanys jáne aqparat mınıstri Asqar Jumaǵalıev ta osy máselege jete toqtalyp ótken bolatyn. Onyń aıtýynsha, memleket salalyq baǵdarlama sheńberinde kadr máselesin oń sheshýdi qolǵa alatyn bolady. «Atap aıtqanda, Halyqaralyq aqparattyq tehnologııalar ýnıversıtetine qomaqty granttar bólý kózdeledi. Budan bólek, aldaǵy úsh jylda ІT salasyn tereńdete oqytatyn kolledjder ashatyn bolamyz. Óıtkeni, joǵary bilim bolǵany árıne jaqsy. Degenmen, bizge joǵary tehnologııalyq óndiristerdiń tilin uǵynatyn mamandar da asa qajet», dedi A. Jumaǵalıev.
