Qazaqstanda IT salasy boıynsha kórsetilgen qyzmetter quny 6 aıda 150 mlrd teńgeden asty
NUR-SULTAN. QazAqparat – Aqparattyq tehnologııalar salasyndaǵy keńes berý jáne tájirıbelik qyzmet kórsetý kólemi bir jyldyń ishinde shamamen bes ese ósken. Bul týraly QazAqparat energyprom.kz saıtyna silteme jasap habarlaıdy.
Kompıýterlik baǵdarlamalaý, sondaı-aq keńes berý jáne osyǵan uqsas qyzmetter quny 2020 jyldyń birinshi jartyjyldyǵynda 153,5 mlrd teńgeni quraǵan – bul ótken jylmen salystyrǵanda 38,9 paıyzǵa kóp.
Bul salada qyzmet kórsetý kóleminiń ósýi besinshi jyl qatarynan baıqalyp otyr.
Sektordaǵy qyzmet kórsetý kóleminiń 90-ǵa jýyq paıyzy Qazaqstannyń eki bas qalasy – Almaty (69,5 mlrd tg) men Nur-Sultanda (68,1 mlrd tg) tirkelgen.
Sondaı-aq, 2019 jyldyń qańtar-maýsym aılarymen salystyrǵanda, qyzmet kórsetý kóleminiń aıtarlyqtaı ósimi baıqalǵan: Nur-Sultanda 23,1 mlrd tg, al Almatyda — 17,8 mlrd tg. 1 mlrd jýyq teńgege jyldyq ósim sondaı-aq Batys Qazaqstan oblysynda tirkelgen.
