Qazaqstanda ISO standarty boıynsha qyzmetkerler quramyn sertıfıkattaý iske asyrylýda
ASTANA. QazAqparat - Qazaqstanda qyzmetkerler quramyn sertıfıkattaýdyń sapa menedjmenti turǵysynda jańa standart engizildi. Bul týraly búgin Astanada ónim sapasy máselelerine arnalǵan halyqaralyq forým barysynda QR Investıtsııalar jáne damý mınıstrligi Tehnıkalyq retteý jáne metrologııa komıteti tóraǵasynyń orynbasary Ǵalymjan Doǵalov málim etti.
«Sapa menedjmenti júıesiniń jańa baǵyty týraly atap ótý óte mańyzdy, ıaǵnı bul qyzmetkerler quramyn sertıfıkattaýǵa baılanysty. Budan buryn osyndaı sertıfıkattaý bolmaıtyn. Biz túrli salalar boıynsha qyzmetkerler quramyn sertıfıkattaý turǵysynda ISO standarttaryn engizýdemiz. Bul qyzmetkerler biliktiligin dáleldeıdi. Ulttyq akkredıtteý ortalyǵynda ISO 17024 standarty talaby boıynsha tıisti uıymdar akkredıtatsııadan ótýde. Qyzmetkerler biliktiligin, bilimin dáleldep, túrli testilerdi tapsyrady. Osydan keıin jeke adamǵa sertıfıkat beriledi. Sonymen qatar sapa menedjmenti sertıfıkaty bar, ol uıymǵa beriledi, al bul sertıfıkat árbir adamǵa jeke tapsyrylady», - dedi ol.
Onyń sózine qaraǵanda, qyzmetkerler quramyn sertıfıkattaý azamattyń óz erkimen júrgiziledi. «Sertıfıkattaý halyqaralyq talaptarǵa sáıkes bolǵandyqtan, biz adamdardy májbúrleı almaımyz. Bizde 2-3 organ akkredıtteýden ótti», - dedi Ǵ. Doǵalov.
Sóz sońynda ol Qazaqstannyń DSU-ǵa kirýi aıasynda jáne Eýrazııalyq ekonomıkalyq odaq boıynsha túrli baǵyttarda sertıfıkattaý júrgizý qazaqstandyq kásiporyndar úshin basymdyqty bolyp tabylatyndyǵyn atap ótti.
