Qazaqstanda ıslam elderiniń aýyl sharýashylyǵy bıoalýantúrliligin saqtaıtyn Gendik bank qurylady
ASTANA. KAZINFORM – Qazaqstan Respýblıkasy Syrtqy ister mınıstriniń orynbasary Arman Isaǵalıev Azyq-túlik qaýipsizdigi jónindegi ıslam uıymynyń (AQIU) Bas dırektory Berik Arynmen kezdesti, dep habarlaıdy mınıstrliktiń baspasóz qyzmeti.
Kezdesý barysynda taraptar Uıymǵa múshe memleketterde azyq-túlik qaýipsizdigin qamtamasyz etýge baǵyttalǵan Qazaqstan men AQIU arasyndaǵy ózara is-qımyldyń ózekti máselelerin talqylady.
A.Isaǵalıev AQIU-ny qurýdyń bastamashysy jáne qazirgi tóraǵasy retinde Qazaqstannyń onyń áleýetin tolyq iske asyrýǵa jáne halyqaralyq bedelin odan ári arttyrýǵa múddeli ekenin atap ótti.
Óz kezeginde, AQIU Bas dırektory birqatar maqsatty jobalardyń iske asyrylý barysy týraly, onyń ishinde Qazaqstan aýmaǵynda Uıymǵa múshe memleketterdiń aýyl sharýashylyǵyndaǵy bıoalýantúrlilikti saqtaýǵa baǵyttalǵan Gendik bank qurý jobasy týraly málimet berdi.
Kezdesý sońynda taraptar Islam yntymaqtastyǵy uıymy (IYU) keńistigindegi azyq-túlik qaýipsizdigi máselelerin sheshý maqsatynda ekijaqty jáne kópjaqty yntymaqtastyqty jalǵastyrýǵa kelisti.
Osyǵan deıin Qazaqstan men Fınlıandııa strategııalyq shıkizat boıynsha jańa tehnologııalardy synaqtan ótkizetini týraly jazdyq.
