Qazaqstanda ishki týrızmdi keńestik kezdegi tájirıbe boıynsha damytpaq
ASTANA. QazAqparat - Qazaqstandaǵy ishki týrızmdi damytýda burynǵy KSRO-nyń tájirıbesi paıdalanylmaq. Bul týraly búgin «Týrızm kúnin qoldaý» taqyrybyndaǵy dóńgelek ústelde Indýstrııa jáne jańa tehnologııalar mınıstrliginiń Týrızm ındýstrııasy komıtetiniń tóraǵasy Marat Iǵalıev málim etti.
Osy oraıda ol týrıstik joldamanyń 80 paıyzyn kásiporyn tólese, al qalǵanyn jumysshynyń ózi óteýi tıis ekenin aıtty. «Bul keńestik kezdegi jaqsy tájirıbe. Osy oraıda eń bastysy - bul joldamalar tek Saryaǵash, Býrabaı, Kaspıı teńizi sekildi qazaqstandyq demalys oryndaryna ǵana arnalýy kerek. Birinshiden, adam demalady, kásiporyn azamatty sanatorııge jiberedi. Ekinshiden, biz elimizdiń ishki týrızmin damytamyz», - deıdi ol.
Komıtet basshysynyń aıtýynsha, osy tektes týrıstik sertıfıkattardy damytý zańnamalyq turǵyda bekitiledi.
M. Iǵalıev aldaǵy jyly komıtet osy bastamany eskere otyryp, «Arnaıy týrıstik aımaqtar týraly» Zańdy ázirleýdi bastaıtyndyǵyn atap ótti.
