Qazaqstanda ishki týrızm qarqyn alyp keledi
ALMATY. QazAqparat - Qazaqstandyqtar ishki týrızmge kóbirek mán bere bastady, dep habarlaıdy QazAqparat Energyprom.kz-ke silteme jasap.
Ótken jyly elimizde ishki týrızm salasynda qyzmetti paıdalanýshylar sany 5,9 mln adamnan asyp ketken. Bir jyl buryn bul kórsetkish 5,6 mln adam edi. Olardyń 4,9 mln adamy qonyp demalǵan.
Sanatorııalyq-kýrorttyq mekemelerdiń qyzmetin paıdalanǵan týrısterdiń sany 296,9 myń adamǵa jetti (bir jyl buryn 285,5 myń adam edi). Erekshe qorǵalatyn tabıǵı oryndarǵa barǵan týrısterdiń sany - 871,9 myń adam (bir jyl buryn 889,6 myń adam bolǵan).
Qazaqstanda bolashaqta balalar men jasóspirimder týrızmin damytýǵa mán berilgeli otyr. Buǵan deıin habarlanǵandaı, 2020 jyldan bastap aımaqtardy aralaıtyn «Balalarǵa arnalǵan tegin poıyz» iske qosylmaq.
Sonymen qatar, «1+2» syzbasy boıynsha kids go free qaǵıdatymen balalarǵa arnalǵan tegin avıabaǵdar ornatý kózdelgen. Ol týraly Mádenıet jáne sport mınıstri Arystanbek Muhamedıuly buǵan deıin aıtyp bergen bolatyn.
Aıta ketsek, qazaqstandyqtardy, sondaı-aq sheteldikterdi qabyldap, demaldyrýǵa ázir ornalastyrý oryndardyń sany ótken jyly 2,99 myńnan 3,32 myńǵa jetken edi. Olardyń kóbi basty týrıstik aımaq sanalatyn Shyǵys Qazaqstanda (537), Almaty oblysynda (519) jáne Aqmola (287) oblysynda shoǵyrlanǵan.
Kýrorttyq aýmaqtarda ornalastyrý oryndarynyń sany 2018 jyldyń qorytyndysy boıynsha 10,4 paıyzǵa, ıaǵnı 900-ge ósken.
Qazaqstanda marketıngtik kommýnıkatsııanyń tıimdiligin kóterý úshin negizgi týrıstik aýmaqtardyń aıqyndalǵany belgili. Aldaǵy ýaqytta sol aýmaqtarǵa barynsha mańyz beriledi.
Atap aıtqanda, el bıligi Almatynyń taý keshenderine, Nur-Sultanǵa, Býrabaıǵa, Túrkistan oblysyna, Alakólge, Mańǵystaý men Baıanaýylǵa, Balqash pen Shalqar-Imantaý kýrorttyq oryndaryna kóptep týrısterdi tartý amaldaryn qarastyrmaq.
Al bir jyldyń ishinde syrtqy týrızm deńgeıi 3,8 paıyzǵa, ishki týrızm deńgeıi 5,8 paıyzǵa artqan.
