Qazaqstanda ishki áýe baǵdarlary sýbsıdııalanady - Týrızm ındýstrııasy komıteti
ASTANA. QazAqparat - Qazaqstanda ishki áýe baǵdarlary sýbsıdııalanady. Mundaı normany QR Indýstrııa jáne jańa tehnologııalar mınıstrliginiń Týrızm ındýstrııasy komıteti «Arnaıy týrıstik aımaqtar týraly» jańa Zańnyń jobasyna engizbek.
«Áýe baǵdarlarynda bizde eń joǵary baǵalar qalyptasqany eshkimge de qupııa emes. Sonymen qatar bizde ishki tasymaldy damytýda problema bar. Biz Týrızmdi damytý tujyrymdamasyn qabyldaý kezinde osy máseleni Kólik jáne kommýnıkatsııalar mınıstrligimen kelistik. Іshki tasymaldar naryǵyn damytý úshin jaǵdaı jasaý boıynsha ishki áýe baǵdarlardy sýbsıdııalaýda túsinistik bar», - dedi «Týrızm kúnin qoldaý» taqyrybyndaǵy dóńgelek ústelde atalǵan komıtettiń tóraǵasy Marat Iǵalıev. Sonymen qatar ol aldaǵy jyly «Eır Qazaqstan» atty jańa áýe kompanııasy qurylatynyn jáne ol jolaýshylardyń ishki tasymalyna negizdeletinin eske salyp ótti.
