Qazaqstanda ishek ınfektsııalaryn aldyn alýdyń onkúndigi bastaldy
«Onkúndik aıasynda elimizdiń barlyq óńirlerinde medıtsınalyq-sanıtarııalyq alǵashqy kómek uıymdarynda ótkir ishek ınfektsııalarynyń aldyn alý jóninde terapevterdiń, jalpy tájirıbe dárigerleriniń, pedıatrlardyń keńes beretin ashyq esik kúnderi uıymdastyrylady. Dúnıejúzilik densaýlyq saqtaý uıymynyń (DDU) «Salaýatty jumys oryndary», «Densaýlyqty nyǵaıtýǵa yqpal etetin aýrýhanalar», «Salaýatty ýnıversıtetter» jobalary sheńberinde mektepke deıingi balalarǵa arnalǵan uıymdardyń, lagerlerdiń, balalar úıleriniń, ınternattardyń, kásiporyndardyń, uıymdardyń qyzmetkerleri úshin oqytý semınarlary men trenıngter ótedi»,-delingen QR Densaýlyq saqtaý jáne áleýmettik damý mınıstrligi málimetinde.
Antısanıtarııalyq jaǵdaılar, jeke gıgıena erejelerin saqtamaý, durys saqtalmaǵan nemese daıarlanbaǵan zararly azyq-túlikti tutyný ishek ınfektsııalarynyń juǵýyna áser etedi. QR UEM Tutynýshylardyń quqyqtaryn qorǵaý komıtetiniń málimeti boıynsha 2014 jyly ótkir ishek ınfektsııalary túrleriniń 13170 oqıǵasy ( 2013 jyly - 14722 oqıǵa) tirkeldi. Onyń ishinde 14 jasqa deıingi balalar arasynda -9780 oqıǵa (2013 jyly - 10833 oqıǵa) oryn aldy. Salmonellez ınfektsııasy men aýyz arqyly juǵatyn vırýstyq enterıttiń tómendegeni baıqalady.