Qazaqstanda ıpoteka mólsherlemesi bastapqy jarnaǵa baılanysty ózgeredi
ASTANA. KAZINFORM – Qarjy naryǵyn retteý jáne damytý agenttiginiń tóraǵasy Mádına Ábilqasymova 1 shildeden bastap ıpotekalyq nesıeler boıynsha jańa mólsherlemeler engizý máselesine qatysty pikir bildirdi.
Onyń aıtýynsha, qazirgi ýaqytta Agenttik Ulttyq bankpen birlesip, kredıtter boıynsha jyldyq tıimdi syıaqy mólsherlemesiniń (JTSM) shekti deńgeılerin belgileıtin qaýlyǵa ózgerister engizý máselesin qarastyryp jatyr.
– Ipotekalyq qaryzdar boıynsha biz jyldyq tıimdi syıaqy mólsherlemesin bastapqy jarna kólemimen baılanystyrýdy josparlap otyrmyz, ıaǵnı, bastapqy jarna 30% jáne odan joǵary bolǵan jaǵdaıda, JTSM deńgeıin 20% mólsherinde belgileý qarastyrylýda. Al bastapqy jarna 30%-dan tómen bolǵan jaǵdaıda, nesıeler boıynsha mólsherleme joǵary bolady, - dedi Mádına Ábilqasymova.
Sonymen qatar onyń sózinshe, qarjy naryǵynyń qatysýshylary bul normanyń ıpotekalyq nesıelerdiń qoljetimdiligine keri áser etýi múmkin ekenin aıtyp otyr.
– Qazirgi tańda naryq qatysýshylary bul talapty keıinge qaldyrý máselesin kóterýde, ıaǵnı, elimizdegi jaǵdaı qolaılyraq bolǵanǵa deıin, atap aıtqanda bazalyq mólsherleme tómendegenge deıin osy normany engizýdi shegerý usynylýda, - dedi agenttik tóraǵasy.
Buǵan deıin Mádına Ábilqasymova kredıttik reıtıng agenttigin qurý bastamasyna qatysty pikir bildirgen edi.
