Qazaqstanda ıpoteka men avtonesıege suranys kúrt artty — Ulttyq bank deregi
ASTANA. KAZINFORM — Qazaqstanda 2026 jyldyń ekinshi toqsanynda bankterdiń nesıe ónimderine suranys artqan. Ásirese ıpoteka men avtonesıege qyzyǵýshylyq aıtarlyqtaı ósken. Bul týraly Ulttyq banktiń bankter arasynda júrgizgen saýalnamasynda aıtyldy.
Ekinshi toqsanda ıpotekalyq qaryzdarǵa suranys 19%-ǵa artyp, bankterge túsken ótinimder sany 228 myńǵa jetken. Ótinimderdiń ortasha somasy da 5%-ǵa ósip, 21,5 mln teńgeni qurady.
Ulttyq bank muny memlekettik jáne óńirlik turǵyn úı baǵdarlamalarynyń iske asyrylýymen jáne keıbir bankterdiń ıpotekalyq ónimderdi qaıta iske qosýymen baılanystyrady.
Ipotekalyq qaryzdardy maquldaý deńgeıi de 10 paıyzdyq tarmaqqa ósip, 33%-ǵa jetken.
Avtonesıe boıynsha ótinishter sany birden 20% ósip, 1,5 mln-ǵa jetti. Alaıda bir ótinimniń ortasha somasy 3% tómendep, 7 mln teńge boldy.
Suranystyń ósýine avtosalondardaǵy jeńildikter, sýbsıdııalanǵan paıyzdyq mólsherlemeleri bar baǵdarlamalar jáne bankterdiń resmı dılerlermen yntymaqtastyǵyn keńeıtýi áser etken.
Avtonesıe boıynsha maquldaý deńgeıi 3 paıyzdyq tarmaqqa ósip, 18% boldy.
Tutynýshylyq nesıege qatysty jaǵdaı qandaı
Kepilsiz tutynýshylyq nesıege túsken ótinimderdiń sany is júzinde ózgermegen — 15,9 mln. Al olardyń ortasha somasy 10% ósip, 1 mln 62 myń teńgege jetken.
Bankterdiń málimetinshe, suranystyń ósýine jalaqy jobalarynyń kóbeıýi, qaıta qarjylandyrý baǵdarlamalary, marketıngtik aktsııalar jáne keıbir bankterdiń skorıng talaptaryn jeńildetýi yqpal etken.
Al kepilmen qamtamasyz etilgen tutynýshylyq qaryzdarǵa ótinimder sany 18%-ǵa azaıyp, 85 myńdy qurady. Soǵan qaramastan, olardyń ortasha somasy 27%-ǵa ósip, 17,7 mln teńgege jetti.
Ekinshi toqsanda iri jáne orta bıznes tarapynan kredıtke suranys artqan. Al shaǵyn jáne mıkrobıznes segmentinde suranys aıtarlyqtaı ózgermegen.
Orta bıznes boıynsha ótinimder sany 4%-ǵa ósip, 5,3 myńǵa jetti. Olardyń ortasha somasy 3%-ǵa artyp, 927 mln teńgeni qurady.
Іri bıznes sýbektilerinen túsken ótinimder sany, kerisinshe, 1%-ǵa azaıyp, 235 boldy. Ortasha ótinim somasy 39%-ǵa tómendep, 11,5 mlrd teńgeni qurady.
Shaǵyn bıznes boıynsha ótinimder sany 1%-ǵa azaıyp, 904 myńǵa tústi. Ortasha suralǵan soma da 8%-ǵa tómendep, 22,8 mln teńgeni qurady.
Bankter úshinshi toqsanda ne kútedi
Ulttyq banktiń saýalnamasyna qatysqan bankter 2026 jyldyń úshinshi toqsanynda ıpoteka men avtonesıege suranys odan ári ósedi dep boljap otyr.
Al kepilmen qamtamasyz etilgen tutynýshylyq qaryzdarǵa suranys burynǵy deńgeıde saqtalady. Kepilsiz tutynýshylyq nesıelerge suranys birtindep tómendeýi múmkin.
Saýalnamaǵa ekinshi deńgeıli 21 bank qatysqan. Ulttyq bank mundaı zertteýdi nesıe resýrstaryna suranys pen usynystaǵy ózgeristerdi baǵalaý úshin ár toqsan saıyn júrgizedi.
Eske salaıyq, buǵan deıin Ulttyq bank tutynýshylyq kredıtteýdi tejeý sharalaryna basa nazar aýdaratynyn habarlaǵan edik.
