Qazaqstanda ıpoteka boıynsha eki shekti mólsherleme engiziledi
ASTANA. KAZINFORM – Qazaqstanda ıpotekalyq nesıeler boıynsha jyldyq tıimdi syıaqy mólsherlemesine qatysty eki shekti mólsherleme engiziledi. Bul týraly Ulttyq bank tóraǵasy Tımýr Súleımenov málim etti.
Onyń aıtýynsha, Ulttyq bank Qazaqstan Respýblıkasynyń qarjy naryǵyn retteý jáne damytý agenttigimen birlesip ıpoteka boıynsha 20 paıyz jáne 25 paıyz kólemindegi eki shekti mólsherlemeni bekitken. Jańa talaptar bıyl 1 shildeden bastap kúshine enedi.
– Bul qarapaıym formýla, eger ıpoteka boıynsha bastapqy jarna 30 paıyzdan joǵary bolsa, onda shekti mólsherleme 20 paıyzdan aspaýy tıis. Al eger bastapqy jarna 30 paıyzdan tómen bolsa, ıpotekalyq mólsherleme 25 paıyzdan aspaıdy. Bul banktermen kelisildi, alaıda áli de tehnıkalyq jumystar bar, - dedi Tımýr Súleımenov Ulttyq bankte ótken brıfıngide.
Buǵan deıin Qarjy naryǵyn retteý jáne damytý agenttiginiń tóraǵasy Mádına Ábilqasymova qazaqstandyqtardyń tabysy tómen bolsa, ıpotekaǵa shekteý qoıylý máselesine qatysty jaýap bergen edi.
