Qazaqstanda Investorlarǵa qyzmet kórsetý jónindegi óńirlik ortalyqtar qurylýda
ASTANA. 23 shilde. QazAqparat - 2012 jyldyń sońyna deıin Qazaqstannyń barlyq óńirinde Investorlarǵa qyzmet kórsetýshi óńirlik ortalyqtar qurylady,
dep habarlady «KAZNEX INVEST» eksport jáne ınvestıtsııalar jónindegi ulttyq agenttiginiń basqarma tóraǵasynyń orynbasary Qaırat Qarmanov pm.kz saıtyna bergen suhbatynda.
«Investorlarǵa qyzmet kórsetý ortalyqtary sııaqty vedomstvolar alǵash ret qurylýda. Ol mekemeler ákimdikterdiń jandarynan ashylýda jáne olardyń mindeti - óńirlerde ınvestorlarmen jumys isteý. Aǵymdaǵy jyldyń sońyna deıin barlyq óńirde osyndaı ortalyqtar qurylady», - dedi Qaırat Qarmanov óz sózinde.
Bul ortalyqtar Qazaqstan aýmaǵynda ındýstrııalyq jobalardy iske asyrýǵa múddeli ınvestorlarǵa ǵana qyzmet kórsetip qana qoımaı, áleýetti áriptesterge de konsýltatsııalyq kómek kórsetetin bolady.
Aıta ketý kerek, mundaı mekemelerdi ashý elimizdiń ınvestıtsııalyq ahýalyn jaqsartý jáne ınvestorlarǵa jaıly jaǵdaı jasaý jónindegi tájirıbelik qadamdardyń biri bolyp tabylady.
Oǵan qosa, elimizdiń ınvestıtsııalyq bedelin jaqsartý baǵytynda aqparattyq keńistikte belsendi jumys júrgizilýde. Atap aıtqanda, tanymal rejısser Tımýr Bekmambetov túsirgen Qazaqstannyń ınvestıtsııalyq múmkindikteri týraly beınebaıan jalpy kórermender qaýymy 300 mln. asatyn CNN, BBC jáne Bloomberg sııaqty álemdik telearnalarda praım-taım ýaqytta 600 ret kórsetildi. Osynyń arqasynda www.invest.gov.kz saıtynyń oqyrmandar sany 2 esege ulǵaıdy.
Qazaqstan Respýblıkasyna sheteldik ınvestıtsııalar tartý jónindegi ulttyq jospardyń aıasynda osyndaı jáne basqa da sharalar iske asyrylýda.
«Ulttyq jospar birneshe taraýdan turady. Sonyń biri - ınvestorlar úshin zańnamany jetildirý jáne qosymsha yntalandyrý sharalaryn qabyldaý. Josparmen sondaı-aq, sheteldik ınvestorlarǵa vızalyq jeńildikter jasaý, tipti keıbir basymdyqty eldermen aradaǵy vızalyq rejımdi alyp tastaý arqyly ınvestıtsııalyq ahýaldy jaqsartý sharalary qarastyrylǵan»,- deıdi Q.Qarmanov.
«Sheteldik ınvestorlardy tartý Qazaqstan úshin óte mańyzdy másele, sebebi tek qarjy ǵana emes, sonymen birge jańa tehnologııalar tartý jáne ÚIID baǵdarlamasyn iske asyrý úshin quzyrlyqty damytý qarastyrylyp otyr. Bul biz úshin eń amńyzdy mindet», - dep túıindedi óz sózin ol.
