Qazaqstanda ınvestıtsııalyq qorlardy qurý jeńildeıdi

ASTANA. KAZINFORM — Qazaqstanda ınvestıtsııalyq qorlar qurý tártibin ózgertý josparlanyp otyr. Tıisti zań jobasyn Májilis depýtattary maquldady.

Depýtat Tatıana Savelevanyń aıtýynsha, qujat Qazaqstan Respýblıkasynyń 2029 jylǵa deıingi ınvestıtsııalyq saıasat tujyrymdamasyn iske asyrý aıasynda ázirlengen.

— Zań jobasynda ınvestıtsııalyq qorlardyń uıymdyq-quqyqtyq nysandary men túrlerin keńeıtý, olardy qurý jáne qyzmetin uıymdastyrý tártibi, biliksiz ınvestorlardyń múddelerin qorǵaý tetikterin engizý, sondaı-aq sheshim qabyldaý fýnktsııalaryn basqarýshy kompanııaǵa berý múmkindigi kózdelgen, — dep túsindirdi depýtat.

Sondaı-aq depýtattar ınvestıtsııalyq qorlardyń jańa túrlerin qurý jáne olardyń qyzmetin uıymdastyrýda týyndaıtyn qatynastardy retteýge, sondaı-aq ınvestıtsııalyq qorlardy baqylaý men qadaǵalaý rásimderin reglamentteýge baǵyttalǵan eki ilespe zań jobasyn qarady.

Atalǵan norma qor naryǵyn damytýǵa, ınvestıtsııalyq qorlar qyzmetiniń ashyqtyǵyn arttyrýǵa jáne ınvestorlardyń kásibı deńgeıin kóterýge múmkindik beredi dep boljanyp otyr. 

Buǵan deıin QR Qarjy naryǵyn retteý jáne damytý agenttigi «Investıtsııalyq qorlar týraly» zań jobasyn jáne oǵan ilespe túzetýlerdi ázirlegeni habarlanǵan bolatyn.