Qazaqstanda ınvestıtsııa kólemi 3,46 trln teńgege jetti
ASTANA. KAZINFORM — 2026 jyldyń alǵashqy úsh aıynda Qazaqstanda negizgi kapıtalǵa salynǵan ınvestıtsııa kólemi artty.
Ulttyq statıstıka bıýrosynyń málimetinshe, ınvestıtsııanyń jalpy kólemi 3,46 trln teńge boldy. Ótken jyldyń osy kezeńimen salystyrǵanda naqty kólem ındeksi 106,4 paıyz bolǵan. Negizgi ósim shıkizattyq emes sektorǵa tıesili. Bul baǵytta bıýdjet qarajatyn eseptemegendegi ınvestıtsııa kólemi 2,31 trln teńgege jetip, naqty kólem ındeksi 128,1 paıyz boldy.
El boıynsha jan basyna shaqqandaǵy ortasha ınvestıtsııa kólemi 168,8 myń teńge boldy. Investıtsııa qurylymynda óndiristik bazany jańartýǵa baǵyttalǵan shyǵyndardyń úlesi artty. Mashına, qural-jabdyq jáne kólik satyp alýǵa jumsalǵan qarajat 1,3 trln teńgege jetip, naqty kólem ındeksi 143,1 paıyz boldy. Al qurylys pen kúrdeli jóndeýge salynǵan ınvestıtsııanyń naqty kólem ındeksi 90,9 paıyzǵa deıin tómendep, jalpy kólemi 1,99 trln teńge bolǵan.
Investıtsııanyń basym bóligi burynǵydaı kásiporyndar men ınvestorlardyń óz qarajaty esebinen júzege asty. Onyń kólemi 2,43 trln teńgege jetti. Bıýdjetten 377,1 mlrd teńge bólindi. Sonyń ishinde 115,3 mlrd teńge respýblıkalyq bıýdjetten, 261,8 mlrd teńge jergilikti bıýdjetten bólindi. Bankter bergen nesıe 271 mlrd teńgeni qurasa, ózge qaryz qarajaty 382,5 mlrd teńgege jetti. Jalpy ınvestıtsııanyń 82,9 paıyzy ishki qarjy kózderinen tartyldy. Al syrttan kelgen qarajat úlesi 17,1 paıyz boldy.
Salalar arasynda eń kóp qarjy dástúrli túrde ónerkásipke baǵyttaldy – 1,5 trln teńge. Onyń ishinde 564,8 mlrd teńge taý-ken óndirý salasyna, 502,6 mlrd teńge óńdeý ónerkásibine, 360 mlrd teńge energetıkaǵa jumsaldy. Budan bólek, jyljymaıtyn múlik salasyna 714,4 mlrd teńge, kólik jáne qoımalaý salasyna 468,5 mlrd teńge, turǵyn úı qurylysyna 662,6 mlrd teńge ınvestıtsııa salyndy.
Óńirler arasynda ınvestıtsııa kólemi boıynsha Astana kósh bastady — 413,7 mlrd teńge. Odan keıin Almatyda 373,6 mlrd teńge, Túrkistan oblysynda 354,2 mlrd teńge boldy. Sondaı-aq Atyraý oblysynda bul kórsetkish 300,9 mlrd teńge, Jambyl oblysynda 218,1 mlrd teńge.
Investıtsııa ósiminiń eń joǵary qarqyny Jambyl oblysynda tirkeldi — 171,6 paıyz. Odan keıin Túrkistan oblysy — 171,2 paıyz jáne Ulytaý oblysy — 166 paıyz.
Al Qostanaı oblysynda, Jetisý oblysynda jáne Shymkentte ınvestıtsııa kóleminiń tómendeýi baıqaldy.
Aıta keteıik, 2023 jyldan beri Qazaqstanda geologııalyq barlaý jumystaryna shamamen 433 mlrd teńge qarjy baǵyttalǵan.
