Qazaqstanda ınvestıtsııalyq sýbsıdııa advalorlyq júıemen beriletin bolady
ASTANA. QazAqparat - Qazaqstanda ınvestıtsııalyq sýbsıdııa advalorlyq júıemen beriletin bolady. Bul týraly búgin QR Prezıdenti janyndaǵy Ortaldyq kommýnıkatsııalar qyzmetinde ótken brıfıngte QR Investıtsııalar jáne damý vıtse-mınıstri Erlan Saǵadıev málim etti.
«Úkimet otyrysynda ınvestıtsııalyq sýbsıdııa berý erejeleri týraly másele qaraldy. Ózderińizde biletindeı, maýsymda ınvestorlar úshin ınvestıtsııalyq sýbsıdııalar berý týraly zańǵa qol qoıyldy jáne atalǵan jańa erejelerge sáıkes biz ınvestıtsııalyq sýbsıdııalardy advalorlyq júıemen beretin bolamyz», - dedi E.Saǵadıev.
Vıtse-mınıstrdiń túsindirýine qaraǵanda, atalǵan júıege sáıkes ınvestıtsııa kólemi artqan saıyn ınvestorlar úshin sýbsıdııanyń paıyzy qysqara beretin bolady.
«Buǵan qosa, ınvestıtsııadyq kelisim jasaǵan mundaı ınvestorlar úshin salyq preferentsııalary men jeńildikter ózgerissiz qalady», - dedi ol.
