Qazaqstanda ınvestıtsııalyq strategııany aıqyndaıtyn úkimettik keńes qurylady - Á.Isekeshev
ASTANA. QazAqparat - Qazaqstanda ınvestıtsııalyq strategııany aıqyndaıtyn úkimettik keńes qurylady. Bul týraly búgin Úkimet otyrysynda QR Investıtsııalar jáne damý mınıstri Áset Isekeshev málim etti.
«Kelesi jyly óńirlik ósim draıverlerin qalyptastyrý maqsatynda básekelestik basymdyqtary men óńirlik erekshelikterin eskere otyryp, makroóńirlerdi damytýdyń ınvestıtsııalyq baǵdarlamasy ázirlenetin bolady. Úılestirý jumystaryn kúsheıtý maqsatynda Úkimettik keńes qurylady», - dedi Á.Isekeshev.
Onyń sózine qaraǵanda, atalǵan keńes ınvestıtsııalyq ahýaldy úılestirýmen qatar iri ınvestıtsııalyq jobalardy qarap, ınvestıtsııalar boıynsha strategııany aıqyndaıtyn bolady.
«Keńes jumysyna halyqaralyq konsýltanttardy, Astanada qurylatyn qarjy ortalyǵyn eskere otyryp, ınvestıtsııalyq bankterdiń ókilderin tartý usynylady», - dedi ol.
Mınıstr osy oraıda búgingi kúni birqatar halyqaralyq konsýltantpen, ınvestıtsııalyq banktermen ýaǵdalastyqqa qol jetkizilgenin eskertip ótti.
