Qazaqstanda ınvestıtsııalyq salyq rezıdenttigin alý rásimderi aıqyndalady
Atap aıtqanda, «Astana» halyqaralyq qarjy ortalyǵy týraly» Qazaqstan Respýblıkasy Konstıtýtsııalyq zańyna ózgerister men tolyqtyrýlar engiziledi. Zań Jobasy Jalpyulttyq jospardyń 27-shi tarmaǵyn, «100 naqty qadam» Ult josparynyń 71-shi tarmaǵyn jáne Prezıdent janyndaǵy Sheteldik ınvestorlar keńesiniń 29-shy jalpy otyrysynyń hattamalyq tapsyrmasyn oryndaý úshin ázirlendi.
«Zań jobasy «ınvestıtsııalyq rezıdent» uǵymyn jáne Qazaqstanda «ınvestıtsııalyq salyq rezıdenttigi» baǵdarlamasyn engizýdi kózdeıdi.
Investıtsııalyq salyq rezıdenttigi baǵdarlamasy qazirgi tańda dúnıe júzinde barynsha keńinen taralǵan qubylys. Halyqaralyq tájirıbeni taldaý ınvestıtsııalyq rezıdenttik naryǵynyń aıtarlyqtaı ósý kezeńinde ekenin kórsetip otyr. Osyndaı baǵdarlamalar aıasynda 500 mıllıonnan 1 mlrd AQSh dollaryna deıin ınvestıtsııalar tartylýda», - dedi QR Úkimet basshysynyń birinshi orynbasary – Qarjy mınıstri Álıhan Smaıylov.
Onyń sózine qaraǵanda, «Astana» halyqaralyq qarjy ortalyǵynyń bazasynda ınvestıtsııalyq salyq rezıdenttigi baǵdarlamasyn qoldaný usynylady.
Onda eldiń ınvestıtsııalyq vızasy men salyq rezıdenttigin alý boljamdalǵan.
«Investıtsııalyq salyq rezıdenttigi baǵdarlamasynyń maqsaty - bul ınvestordyń jáne onyń otbasy músheleriniń Qazaqstan Respýblıkasyna kóp márteli kirý vızasyn berý arqyly ınvestıtsııalardy tartý. Baǵdarlamada ınvestıtsııalaýdyń kólemi men quraldary, ınvestıtsııalyq salyq rezıdenttigin alý rásimderi aıqyndalady. Osy tusta Qarjy ortalyqtyń ınvestıtsııalyq rezıdenti mártebesin alý protsessi týraly qysqasha toqtalý qajet.
Eń aldymen, áleýetti sheteldik ınvestor «Astana» halyqaralyq qarjy ortalyǵy keńsesinde senimdilikke jáne osy qarjy ortalyǵy týraly Konstıtýtsııalyq zańda belgilengen talaptarǵa sáıkestigine tekserýden ótedi. Tekserýden ótkennen keıin áleýetti sheteldik ınvestor Ortalyqtyń qarjylyq quraldaryna ınvestıtsııalar salyp (keminde 60 000 $), ınvestıtsııalyq rezıdent mártebesin ala alady», - dep naqtylady Á. Smaıylov.
Investıtsııalyq rezıdent «Astana» halyqaralyq qarjy ortalyǵynyń ótinishhaty boıynsha 5 jylǵa deıingi merzimge kirý vızasyn alýǵa quqyly.
Ári qaraı, ınvestor elde turyp jatqanyna 90 kún ótkennen keıin jáne bıýdjetke jyl saıynǵy mindetti tólemdi tólegennen keıin, ol Qazaqstan Respýblıkasynan tys jerlerdegi kózderden paıda bolǵan kirister boıynsha jeke tabys salyǵyn tóleýden bosatý quqyǵyn alady.
Eldiń ishinde týyndaǵan kiristerge Salyq kodeksine sáıkes salyq salynatynyn atap ótý mańyzdy.
