Qazaqstanda ınvestıtsııalyq salyq kredıtin engizý usynyldy

NUR-SULTAN. QazAqparat – Parlament Májilisiniń jalpy otyrysynda Ulttyq ekonomıka mınıstri Rýslan Dálenov ınvestıtsııalyq salyq kredıtin engizý usynysyn aıtty, dep habarlaıdy QazAqparat tilshisi.

Búgin jalpy otyrysta «Qazaqstan Respýblıkasynyń keıbir zańnamalyq aktilerine salyq salý jáne ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zańynyń jobasy talqylanyp jatyr.

«Investıtsııalyq salyq kredıtin engizý usynylady. Kredıt korporatıvtik tabys salyǵy jáne múlik salyǵy boıynsha 3 jylǵa beriledi. Ol paıyzsyz bolady, biraq sharttar oryndalmaǵan jaǵdaıda ósimpul esepteledi», - dedi mınıstr.

Onyń sózine qaraǵanda, maqtany qaıta óńdeýge, ashytqy, kondıterlik ónimder, qant qyzylshasynan qantty óndirýge eseptelgen qosylǵan qun salyǵyn azaıtý boıynsha normany qoldaný usynylady. Bul aýyl sharýashylyǵy ónimderin qaıta óńdeýdi, óndiris kólemin ulǵaıtýdy yntalandyratyn bolady.

«Eksport kezinde qosylǵan qun salyǵyn qaıtarý rásimin ońaılatý maqsatynda otandyq óndirýshiler úshin qosylǵan qun salyǵyn jeńildetilgen túrde qaıtarý quqyǵyn berý usynylady: ıaǵnı tekserýsiz – 50%, qalǵan 50% - tekserýden keıin», - dedi R. Dálenov.

Budan bólek, kólik quraldary men aýyl sharýashylyǵy tehnıkasynyń komponentterin óndirý úshin qosylǵan qun salyǵy boıynsha jeńildikti qoldaný usynylady. Bul otandyq avtokólikterdegi qazaqstandyq qamtý úlesin arttyrady.