Qazaqstanda Investıtsııalyq qorlar qaýymdastyǵyn qurý qajet - UVCA dırektory
«Saparymnyń negizgi maqsaty startap júıesimen tanysý. Osy jerde 100-ge jýyq startap usynylǵan eken. Jergilikti jáne sheteldik ınvestorlar da óte kóp. Sondyqtan tájirıbeńmen bólisip, baılanys ornatý óte mańyzdy. Jalpy qazaqstandyq startaptarmen endi tanysa bastadym»,- dedi ýkraınalyq kompanııanyń basshysy.
Onyń aıtýynsha, UVCA kompanııasynda tehnologııalyq bilim alǵan ınjenerler kóp jumys isteıdi. Sonyń arqasynda startap júıesi de jaqsy damyǵan.
«Endi sizder men bizdiń jetistikterimizdi biriktirip, kádege jaratqymyz keledi. Al Qazaqstannan ne kórip otyrmyn? Sizderde ІT-ındýstrııasyn damytýǵa degen saıası erik-jigerdiń bar ekendigi qýantady. Bul salaǵa kapıtalyn salýǵa daıyn jeke ınvestorlar da jetkilikti. Menińshe, jahandyq ta, sheteldik de ınvestorlar kire alatyn Investıtsııalyq qorlar qaýymdastyǵyn qurý kelesi zańdy qadam bolar edi. Ol úshin barlyq múmkinshilik bar. Eń bastysy - bul nıet pen ınnovatsııany qabyldaýǵa daıyndyq», - dedi Olga Afanaseva.
Aıta keteıik, forýmynyń ashylýynda QR Aqparat jáne kommýnıkatsııalar mınıstri Dáýren Abaev Qazaqstan Azııa men Eýropa tehnologııalyq ortalyqtarynyń arasynda altyn kópirge aınalatyndyǵyn aıtty.
Digital Bridge - Qazaqstandaǵy bıylǵy jyly ótip otyrǵan basty ınnovatsııalyq oqıǵa.
Qatysýshylar forýmnyń dıalogtik alańynda tsıfrlandyrý salasyndaǵy sońǵy álemdik trendterdi talqylap, aldyńǵy qatarly tájirıbelermen jáne bıznes-modeldermen bólisedi. Forýmǵa halyqaralyq ІT-qoǵamdastyǵynyń negizgi ókilderi, tehnologııa salasyndaǵy tanylǵan sarapshylar, kásiporyn basshylary, tehnologııalyq kásipkerler, sondaı-aq birqatar eldiń memlekettik sektorlarynyń ókilderi, ǵalymdar, tsıfrlyq ázirlemeler salasynyń mamandary, venchýrlyq ınvestorlar qatysýda.
Forým aıasynda «Tsıfrlyq ekonomıka damýynyń jahandyq trendi jóninde dıalogy» atty plenarlyq sessııasy ótedi. Sonymen qatar sessııa jumysyna QR Premer-Mınıstri Baqytjan Saǵyntaev, Reseı Federatsııasynyń tsıfrlyq damý, baılanys jáne buqaralyq kommýnıkatsııalar mınıstri Konstantın Noskov qatysady dep kútilýde.