Qazaqstanda ınvestıtsııalar kólemi 30-40 paıyzǵa tómendeýi múmkin - Á. Isekeshev
ASTANA. QazAqparat - Qazaqstanda 2015 jyldyń qorytyndylary boıynsha ınvestıtsııalar kólemi 30-40 paıyzǵa tómendeýi múmkin.
Bul týraly búgin OKQ brıfıngi barysynda QR Investıtsııalar jáne damý mınıstri Áset Isekeshev málim etti.
«Álemdik ekonomıkada bolyp jatqan jahandyq shaqyrýlar, álemdegi ınvestıtsııalarǵa da áser etedi. Tikeleı ınvestıtsııalar qaýipsiz naryqtarǵa oıysyp jatyr. Damyǵan elderge aǵylýda. Sondyqtan damýshy elderde ınvestıtsııalar kólemi kemip otyr», - dep habarlady Á.Isekeshev.
Onyń sózine qaraǵanda, bul úderis Qazaqstanǵa da keri áserin tıgizdi.
«Byltyrǵy jylǵy statıstıka joq, degenmen ınvestıtsııalar boıynsha 30-40 tómendeý bolady dep boljap otyrmyz», - dedi mınıstr.
Alaıda onyń sózi boıynsha, ındýstrııalandyrý aıasynda jasalǵan jumystar oń nátıjelerge ákeldi.
«Bizde ınvestıtsııalar negizinen munaı-gaz, taý-ken salasynda 70 %, qurylysta 50 %-ǵa tómendeý boldy. Óńdeýshi salada ahýal táýir, shamamen 10 paıyzdy qurady», - dep atap ótti ol.
QR IDM basshysy málim etkenindeı, sońǵy jyldary Qazaqstan ınvestıtsııalardy tartý baǵytynda qyrýar jumystar atqaryp keledi.
«Bizde barlyq deńgeılerde jumys jolǵa qoıylǵan. Bizde ulttyq ınvestorlardyń kómegimen 150 jobany júzege asyrý josparlanýda, olar Qazaqstan úshin jańa salalar bolyp tabylady», - dedi Á.Isekeshev.
